USHINDI WA MECHI MBILI TU, UNAITOSHA TP MAZEMBE IKIWA NA SAMATTA, ULIMWENGU KUCHEZA FAINALI KOMBE LA DUNIA

Mechi mbili tu, zinawatosha Watanzania Mbwana Samatta kuweka rekodi ya kucheza fainali ya Kombe la Dunia kwa klabu.

Kwa Mujibu wa ratiba ya michuano hiyo ya Fifa ya Kombe la Dunia kwa Klabu, Mazembe imepangwa kuanzia katika hatua ya robo fainali huku Barcelona ikipewa heshima ya kuanzia nusu fainali.

Tayari Mbwana Samatta na Thomas Ulimwengu wamekanyaga ardhi ya Japan wakiwa na kikosi cha cha TP Mazembe kutoka DR Congo.

TP Mazembe ambao ni mabingwa Afrika, watacheza mechi yao ya kwanza Desemba 13 dhidi ya mshindi wa mechi ya kwanza kati ya wenyeji Sanfrence Hiroshima ya Japan dhidi ya Auckland City ya New Zealand.

Iwapo Mazembe itashinda mechi yake hiyo ya kwanza, moja kwa moja inakwenda kukutana na mabingwa wa America Kusini ambao ni River Plate ya Argentina na mechi itapigwa Desemba 16, hiyo itakuwa ni nusu fainali ya kwanza.

Nusu fainali ya pili, itazikutanisha  Barcelona dhidi ya mshindi wa mechi kati ya America ya Mexico dhidi ya Guangzhou Evergrande ya China.

Iwapo Mazembe itashinda katika nusu fainali ya kwanza, Barcelona ikashinda nusu fainali ya pili, basi timu hizo zitakutana katika fainali itakayopigwa Desemba 20.