CHANONGO, UBWA RASMI KUANZA KAZI YA KUISAKA RIZIKI YA TP MAZEMBE KESHO

Kiungo Haruna Chanongo na beki Abuu Ubwa wote wa Stand United, kesho wanaanza rasmi majaribio na kikosi cha TP Mazembe.

Mkurugenzi wa Michezo wa TP Mazembe, Frederick Kitenge amesema leo wangeweza kupasha kidogo lakini Jumatatu ni rasmi.

“Jumatatu watakuwa na wenzao, wataanza majaribio hayo ambayo yanaweza kuwa hadi wiki mbili au chini ya hapo kulingana na benchi la ufundi litakavyokuwa limeona,” alisema.

Wawili hao ambao wako chini ya Jamal Kisongo wamepata nafasi hiyo ambayo itakuwa ni kazi kwao kuitumia vizuri au kuiacha iende.