FRED MBUNA, BEKI MBEYA CITY WAFIKISHWA KAMATI YA NIDHAMU, STENDI YAPIGWA FAINI

MBUNA (KULIA) AKISALIMIANA NA KIPA WA MTIBWA SUGAR, SAID MOHAMMED.

Kamati ya Uendeshaji na Usimamizi wa Ligi imeipiga faini ya sh. 500,000 (laki tano) klabu ya Stand United baada ya timu yake kupata kadi zaidi ya tano kwenye mechi ya Ligi Kuu ya Vodacom dhidi ya Coastal Union iliyofanyika Uwanja wa Mkwakwani jijini Tanga. 

Katika mechi hiyo iliyochezwa Desemba 26, 2015, timu hiyo ilipata kadi saba kinyume na Kanuni ya 42(11) ya Ligi Kuu.

Wachezaji Fred Mbuna wa Majimaji, na Hamad Kibopile wa Mbeya City watafikishwa kwenye Kamati ya Nidhamu ya Shirikisho la Soka Tanzania (TFF) kutokana na kufanya vitendo vya utovu wa nidhamu wakati wa mechi kati ya timu zao dhidi ya Azam na Yanga.

Kibopile aliwatolewa waamuzi lugha za kudhalilisha wakati wa mapumziko kwenye mechi dhidi ya Yanga, huku Mbuna akipiga teke chupa ya maji, na maji hayo kuwarukia waandishi wa habari wakati wakiripoti mechi hiyo mjini Songea.