LIGI KUU BARA SARE ZATAWALA LEO MATOKEO, MECHI SABA SARE SITA

Pamoja na mechi iliyokuwa inasubiriwa kwa hamu kati ya wenyeji Yanga dhidi ya Mtibwa Sugar kwisha kwa sare ya bila kufungana, sare zimetawala kwa asilimia 90 katika mechi za leo.

Katika mechi saba zilizochezwa leo ni mechi moja tu ambayo kumekuwa na ushindi huku sita zote zikiwa ni sare.

Mechi pekee iliyokuwa na ushindi ni ile Ndanda FC ikiwa nyumbani imefanikiwa kuiripua Lipuli kwa mabao 2-1.

Lakini nyingine sita, sare zimechukua nafasi ukianza na sare ya 0-0 kati ya Yanga Vs Mtibwa Sugar.

DODOMA:
Azam FC ikiwa ugenini dhidi ya Singida United, imelazimisha sare ya 1-1 baada ya kusawazisha.

MWADUI:
Nayo Mwadui FC ikiwa nyumbani iemshindwa kuulinda ushindi wake kwa kuiachia Mbeya City isawazishe na matokeo kuwa 2-2.

MWANZA:
Pamoja na kuonyesha wako vizuri, Mbao FC nao wameokoka wakiwa nyumbani CCM Kirumba baada ya kusawazisha katika mechi dhidi ya Prisons iliyotangulia kufunga. Dakika 90 zimeisha 1-1.

SONGEA:
Majimaji wakiwa kwenye Uwanja wa nyumbani wa Majimaji mjini Songea wametoka uwanjani kwa sare ya 0-0 dhidi ya Kagera Sugar.

PWANI:
Ruvu Shooting walio nyumbani, nao wameshindwa kupata ushindi baada ya Njombe Mji kuamka na kusawazisha na matokeo ya dakika 90 yakawa 1-1.