SIMBA HII NI MVUMO WA RADI, YAACHA KILIO NAMFUA STADIUM

Na George Mganga

Licha ya kuwa mabingwa msimu huu wa 2017/18, kikosi cha Simba kimezidi kuonesha dhamira ya kumaliza ligi bila kupoteza mchezo baada ya kuifunga Singida United ikiwa nyumbani kwa bao 1-0.

Singida ilikubali kuruhusu bao hilo mnamo dakika ya 24 ya kipindi cha kwanza kupitia kwa beki wa Simba, Shomari Kapombe.

Katika mechi hiyo, Singida waliutawala kwa kiwango kikubwa haswa katika eneo la kati na mbele, lakini safu yao ya ushambuliaji ilishindwa kuleta madhara kutokana na uimara wa mabeki wa Simba.

Matokeo hayo yanaifanya Simba izidi kujikita kileleni kwa kufikisha jumla ya pointi 68 huku ikiwa imesaliwa na michezo miwili dhidi ya Kagera Sugar na Majimaji FC.

Azam Fc inashika nafasi ya pili ikiwa na alama 52 na Yanga ikimata namba tatu kwa kujikusanyia pointi 48.