JKT TANZANIA YAPANIA KUIVURUGA TENA SIMBA KESHO VPL

KOCHA Mkuu wa timu ya JKT Tanzania, Mohamed Abdallah ‘Bares’ amesema kuwa wanatambua mchezo wao dhidi ya Simba utakaochezwa kesho uwanja wa Uhuru utakuwa mgumu ila hawana hofu kwa kuwa wamejipanga kuvuruga hesabu za Simba.

Mchezo huo ambao ulipangwa kuchezwa Agosti 23 ulipelekwa mbele kutokana na Simba kucheza michezo ya Ligi ya Mabingwa na wamefungashiwa virago na UD do Songo kwa faida ya bao la ugenini, uwanja wa Taifa.

Akizungumza na Saleh Jembe, Bares amesema kuwa maandalizi yao yapo sawa na wanatambua Simba ina hasira ya kufungashiwa virago kimataifa wao wamejipanga kuzivuruga tena.

“Program yangu maalumu kwa wachezaji imekamilika na wanatambua aina ya timu wanayokwenda kukutana nayo inataka kuanza kupunguza hasira kwetu hilo litakuwa gumu kufanikiwa lazima tuvuruge hesabu zao kwanza.

“Mchezo wa ufunguzi siku zote unatoa picha kamili ya kule unakokwenda sasa wachezaji nao wanalitambua lazima tufanye kweli, mashabiki wajitokeze kwa wingi kuona burudani na mpaka sasa hakuna majeruhi,” amesema Bares.

Mchezo wao wa mwisho uwanja wa Uhuru msimu uliopita JKT alipoteza kwa kufungwa bao 1-0 lilifungwa dakika za usiku na Hassan Dilunga.