MUUAJI WA SIMBA APANIA KUWAMALIZA JUMLA LEO TAIFA

KASSIM Khamis, nyota mpya wa Azam FC ambaye amesajiliwa ndani ya Azam FC akitokea Kagera Sugar amesema kuwa kikosi kipo tayari kwa ushindani dhidi ya Simba kwenye mchezo wa ngao ya jamii na wana imani ya kupata matokeo.

Azam FC ambao ni mabingwa wa kombe la Shirikisho watamenyana na Simba ambao ni mabingwa wa Ligu Kuu Bara, leo uwanja wa Taifa kwenye mchezo wa ngao ya jamii ambao ni maalumu kwa ajili ya ufunguzi wa ligi inayotarajiwa kuanza Agosti 23.

Akizungumza na Saleh Jembe, mshambuliaji huyo ambaye aliwahi kuifunga Simba kwenye mchezo wa ligi wakati akiwa ndani ya Kagera Sugar, msimu uliopita alisema kuwa nafasi ya kushinda ipo .

“Tumejiandaa vema, mbinu mpya na kali ambazo tumepewa zinatupa matumaini makubwa kwamba tutashinda hatuna wasiwasi.

“Kama niliwafunga wakati nipo Kagera Sugar inamaana bado nina nafasi ya kuwafunga tena nikikutana nao, haijalishi ninacheza na timu gani kazi yangu mimi ni mshambuliaji,” amesema Kassim.