ATAKAYECHUANA NA HAJI MANARA SIMBA APEWA RASMI MAJUKUMU YAKE YANGA

Na George Mganga

Uongozi wa Yanga umempa majukumu rasmi Mhamasishaji Mkuu wa klabu hiyo, Antonio Nugaz ambapo leo ametambulishwa rasmi ndani ya klabu hiyo.

Nugaz ambaye ni mtangazaji wa kituo cha Radio Clouds FM, ametambulishwa mbele ya waandishi wa habari kunako makao makuu ya klabu hiyo, mitaa ya Twiga, Kariakoo jijini Dar es Salaam.

Akizungumza, Kaimu Katibu ambaye awali alikuwa Ofisa Habari wa timu hiyo, Dismas Ten, amesema Nugaz atahusika zaidi na kupasha taarifa za klabu hiyo.

Ten amesema Nugaz atahusika zaidi na utoaji wa taarifa za Yanga ili kutia hamasa kwa mashabiki na wanachama wa klabu hiyo.

Kwa upande mwingine, Ten ameeleza kuwa Ofisa Habari wa klabu hiyo ambaye pia ametambulishwa leo, Hassan Bumbuli, yeye atahusika na kuratibu taarifa zote za klabu.

"Atakayeratibu shughuli za utoaji taarifa ni Ofisa habari, na atakayetoa taarifa za klabu ya Yanga ni Ofisa Mhamasishaji."