MZEE KILOMONI AIBUKA UPYAAA!! AIZODOA SIMBA

Aliyekuwa Mwenyekiti wa Baraza la Wadhamini katika klabu ya Simba, Hamis Kilomoni, amesema kikosi cha timu yao bado ni cha kawaida kutokana na namna kilivyocheza mechi za mwanzo katika Ligi Kuu Bara msimu huu.

Mpaka sasa Simba imeshacheza jumla ya michezo miwili ya ligi ambayo ni dhidi ya JKT Tanzania ikishinda 3-1, na dhidi ya Mtibwa Sugar ambao iliibuka pia na ushindi wa mabao 2-1.

Kilomoni ambaye amekuwa akivutana na uongozi wa Simba haswa Mwenyekiti wa Bodi wa Wakurugenzi, Mohammed Dewji 'Mo' kuhusiana na suala la uwekezaji ndani ya klabu, ameeleza timu hiyo inapaswa kufanya usajili haraka ili ifanye vizuri.

Kilomoni amefunguka akieleza katika nafasi ya ushambuliaji timu imekuwa haieleweki ikikosa muunganiko mzuri kwa wachezaji kitu ambacho kinapelekea umaliziaji kuwa butu.

Ameongeza kwa kusema Simba ya msimu uliopita na sasa ni vitu viwili tofauti, akisema hii haina mtu kama Emmanuel Okwi ambaye alikuwa na mchango wake mkubwa haswa kwenye mechi za kimataifa.

"Kwakweli timu yetu kwa sasa ni ya kawaida licha ya kushinda mechi zake mbili za mwanzo.

"Katika safu ya ushambuliaji ina tatizo kubwa ambalo linapelekea tukose nafasi nyingi za wazi, hii inaweza ikaja ikatugharimu zaidi siku za usoni maana kuna timu nyingi kwenye ligi.

"Kuondoka kwa Okwi katika namna moja ama nyingine inaweza ikawa imeleta madhaifu kadhaa kutokana na mchango wake aliokuwa anuonesha haswa kwenye mechi za kimataifa.

"Ni vema uongozi ukafanya usajili wa mchezaji mwingine haraka ili tupate mtu mzuri atakayesaidiana na Kagere ambaye ndiye amekuwa mhimili mkubwa kwenye safu hiyo hivi sasa," alisema Kilomoni.