KAGERE ANA MABAO MAWILI KWA MWADUI FC YA SHINYANGA

MEDDIE Kagere mfungaji bora msimu uliopita kwenye jumla ya mabao 23 aliyofunga mawili alifunga mbele ya Mwadui FC nje ndani ambayo leo itawakaribisha uwanja wa Kambarage.

Simba imecheza mechi sita, Kagere ametupia mabao saba akifuatiwa na mzawa Miraj Athumaan mwenye mabao manne huku nahodha msaidizi Mohamed Hussein akitupia moja na kukamilisha jumla ya mabao 12 waliyofunga Simba.

Bao la kwanza aliwafunga uwanja wa Kambarage wakati Simba ikishinda mabao 3-0 akimalizia asisti ya Shiza Kichuya kwa mguu wake wa kulia na mabao mawili yalifungwa na nahodha John Bocco ambaye alionyeshwa kadi yake nyekundu ya kwanza kwa msimu wa 2018/19 kwa kumchezea rafu mchezaji wa Mwadui.

Bao la pili alifunga uwanja wa Taifa akimalizia asisti ya Clatous Chama kwa kichwa Simba ilishinda mabao 3-0 mengine yalifungwa na Mzamiru Yassin na John Bocco.

Simba imekutana mara nane na Mwadui FC ambayo imepanda daraja msimu wa 2015/16,  imeshinda mechi 5, sare 2 huku  Mwadui ikishinda mechi moja tu iliyochezwa uwanja wa Taifa msimu wa mwaka 2015/16 na bao la ushindi lilipachikwa na Jamal Mnyate dakika ya 73.