MTIBWA SUGAR YAZITAKA POINTI TATU ZA COASTAL UNION LEO

UONGOZI wa Mtibwa Sugar umesema kuwa kwa sasa gari limewaka watamchapa kila atakayeshuka uwanja wa Jamhuri ili kuzipata pointi tatu na leo itakuwa zamu ya Coastal Union.

Kwenye michezo nane ambayo Mtibwa Sugar imecheza, imeshinda michezo miwili ikilazimisha sare michezo miwili na kupoteza michezo minne iliyowapa pointi nane.

Akizungumza na Saleh Jembe, Ofisa Habari wa Mtibwa Sugar, Thobias Kifaru amesema kuwa ushindi wa mabao 2-0 mbele ya Polisi Tanzania umeamsha ari mpya ya wachezaji kupambana.

“Tulikuwa tukipata matokeo mabovu yasiyopendeza kwa mashabiki sasa baada ya kushinda mchezo wetu wa pili mbele ya Polisi Tanzania gari imewaka tutaendeleza moto huu mpaka kieleweke.

“Ndani ya Mtibwa kila kitu kipo sawa, wachezaji wana morali kubwa mwanzo mbaya umetupa funzo na sasa kazi yetu mbele ya Coastal Union ni moja tu kusaka pointi tatu muhimu,” amesema Kifaru.

Juma Mgunda Kocha wa Coastal Union amesema kuwa kikosi kipo sawa na kitapambana kupata matokeo chanya bila hofu licha ya kuwa watakuwa ugenini.