MBAO FC V MBEYA CITY NI VITA YA KIBABE LEO

MBAO FC ya Mwanza inayonolewa na Hemed Seleman 'Morocco' leo ina mtihani mzito wa kupangua hasira za kichapo cha mabao 4-1 kilichoikumba Mbeya City mbele ya Kagera Sugar huku wao wakiwa na kibarua cha kujipooza kichapo cha bao 1-0 mbele ya Yanga.

Mchezo huu utakaopigwa uwanja wa CCM Kirumba utakuwa na ushindani mkubwa kutokana na timu zote mbili kuwa na mwenendo wa kusuasua msimu huu ndani ya ligi.

Mbeya City iliyo chini ya Juma Mwambusi imecheza mechi sita imepoteza mbili na kupata sare nne ikiwa na pointi zake nne huku Mbao FC ikiwa na pointi 7 imecheza mechi 7 imeshinda mmoja sare nne na kupoteza mechi mbili.

Akizungumza na Saleh Jembe, Morroco amesema kuwa tatizo kubwa linalomponza ni safu ya ushambuliaji kushindwa kumalizia nafasi wanazozipata.

“Tunapambana kujiweka sawa na tunachohitaji ni ushindi kupoteza kwetu haina maana kwamba hatuna uwezo tutapambana kupata pointi tatu mbele ya Mbeya City,”.

Mwambusi wa Mbeya City amesema kuwa matokeo wanayoyapata si ya kufurahisha ni lazima wapambane kushinda mechi zinazofuata.