MTIBWA SUGAR: KAZI IMEANZA TUTAMCHAPA KILA ANAYEKUJA KWETU

UONGOZI wa Mtibwa Sugar umesema kuwa kwa sasa kazi ndo imeanza watashusha kichapo kwa kila anayefuata baada ya kushinda mbele ya Polisi Tanzania kwa mabao 2-0 uwanja wa Jamhuri.

Ushindi huo ni wa pili kwa Mtibwa ambayo imecheza jumla ya michezo nane, imepoteza mechi nne ikitoa sare mechi mbili na ushindi mechi mbili ikiwa  imejikusanyia jumla ya pointi nane nafasi ya 12.

Akizungumza na Saleh Jembe, Ofisa Habari wa Mtibwa Sugar, Thobias Kifaru alisema kuwa wameanza kupata mwanga baada ya kukusanya pointi tatu jambo litakalokuwa na mwendelezo mwanzo mwisho.

“Tunafurahi kazi imeanza kuonekana kile ambacho mashabiki walikuwa wanakihitaji kimejibu, hivyo ni mwanzo utakaokuwa na mwendelezo kwa kila atakayekutana nasi kwani tayari mbinu imeshajibu.

“Matokeo yetu mabaya ya nyuma tunayafanya kuwa darasa na hiki tulichokipata ni salamu kwa wapinzani wetu Coastal Union ambao tutamenyana nao Uwanja wa Jamhuri, Oktoba 30, mashabiki waendelee kutupa sapoti,” alisema.

Kocha wa Polisi Tanzania, Seleman Matola alisema kuwa haikuwa bahati yao kupata ushindi licha ya wachezaji kupambana kupata matokeo chanya mambo yaligoma.