LIVERPOOL YAKUBALI KIROHO SAFI KICHAPO CHA MKONO

LIVERPOOL wamekutana na kichapo cha mwaka baada ya kuchapwa mabao 5-0 na Aston Villa katika mchezo wa robo fainali ya Kombe la Carabao uliochezwa jana Jumanne.

Liverpool walichezesha wachezaji wengi ambao umri wao ni chini ya miaka 19 kwenye mchezo huo kutokana na timu ya wakubwa kwenda kwenye mchezo wa Klabu Bingwa Dunia nchini Qatar.

Kocha wa Liverpool, Juggen Klopp aliomba mchezo huo usogezwe mbele lakini FA wakagoma na akaamua kupeleka vijana ambao wamekutana na kichapo hicho.

   

Villa ambao walikuwa wanatumia zaidi uzoefu kwenye mchezo huo walipata mabao yao kupitia kwa Conor Hourihane dakika ya 14, Morgan Boyes (alijifunga dakika ya 17), Jonathan Kodjia (37 na 45) na Wesley Moraes (90).

Kocha wa Liverpool chini ya miaka 23 ambaye alikuwa anaisimamia timu hiyo, Neil Critchley, amesema kuwa anakubaliana na kichapo hicho, lakini anaamini kuwa wachezaji wake wamejifunza kitu kwenye mchezo huo uliopigwa kwenye Dimba la Villa Park.

“Tumekutana na timu kubwa England, wachezaji wangu wengi hawakuwa na uzoefu na hilo ndiyo limetusumbua, naamini kuwa watakuwa wamejifunza kitu kipya,” alisema kocha huyo.