MAPEMA jana Ijumaa, taarifa za
mshambuliaji, na nahodha wa timu ya Taifa ya Tanzania, Mbwana Samatta kujiunga
na Fenerbahçe ya Uturuki, zilithibitishwa rasmi na klabu hiyo.
Samatta amejiunga na timu hiyo kwa
mkataba wa miaka minne akitokea Aston Villa ya England aliyoitumikia kwa
takribani miezi nane tu baada ya kujiunga nayo Januari, mwaka huu akitokea KRC
Genk ya Ubelgiji.
Kwenda kwake nchini Uturuki kucheza
soka, inakuwa ni ukurasa mpya ameufungua, lakini ni katika mwendelezo wa
mapambano yake kisoka.
Kama tunavyofahamu, safari ya
Samatta kisoka haikuwa ya mkato, kuanzia Mbagala Market ambayo kwa sasa ni African
Lyon, Simba, TP Mazembe, KRC Genk na Aston Villa, huko kote alionesha uwezo
ingawa kuna changamoto alikumbana nazo.
Nikurudishe nyuma kidogo, kitendo
cha Samatta kucheza Simba nusu msimu kisha kuchukuliwa na TP Mazembe ya DR
Congo, ni wazi alionesha uwezo mkubwa kiasi cha matajiri hao kutoka DR Congo
kumchukua.
Akiwa TP Mazembe, aliweka nembo
yake pale, hata alipokuwa akiondoka mwaka 2016 kwenda KRC Genk, mashabiki hadi
viongozi wa klabu hiyo hawakuwa tayari kuona akiondoka kirahisi kwani mara
kadhaa alizuiwa na uongozi chini ya Moise Katumbi.
Samatta alifanya makubwa ndani ya
TP Mazembe kiasi cha mwaka 2015 kutwaa Tuzo ya Mchezaji Bora Afrika kwa
Wanaocheza Ligi za Ndani. Pia aliwahi kuwa mfungaji bora wa Ligi ya Mabingwa
Afrika kwa mwaka huo.
Kuondoka kwake pale TP Mazembe,
hakuacha deni, aliifanya kazi yake ipasavyo, ndiyo maana Wabelgiji waliona huyu
mwamba anawafaa.
Alipoenda KRC Genk, huko nako
aliuwasha moto. Wakati anaondoka Januari, mwaka huu na kutua Aston Villa,
Wabelgiji walihuzunika sana kuona staa wao anaondoka.
Haikuwa rahisi kwake kuiweka alama huko
kote anakopita, bali ni kwa juhudi na kutokata tamaa ndiyo kulikombeba zaidi
nahodha huyo wa Taifa Stars.
Genk na Watanzania wana kumbukumbu
nzuri sana ya Samatta kutokana na bao lake la kichwa pale Anfield dhidi ya
Liverpool kwenye Ligi ya Mabingwa Ulaya mwaka 2018.
Samatta ndani ya Aston Villa,
alianza taratibu, bao lake moja ndani ya Premier na lingine katika Carabao Cup
mbele ya Manchester City, lilionesha kweli ni mpambanaji. Kukosa nafasi kubwa
ya kucheza, kukamfanya ashindwe kuonesha cheche zake.
Aston Villa ilipoponea chupuchupu
kushuka daraja, imeona msimu huu ijiimarishe zaidi hasa kwenye nafasi ya
ushambuliaji kwa kushusha vifaa viwili. Ollie Watkins na Bertrand Traore, hapo
nafasi ya Samatta ikawa finyu, akachukua uamuzi wa kuondoka.
Kuondoka kwake England si kwamba
ndiyo mwisho wa safari. Kama asemavyo mwenyewe kwamba HAINA KUFELI, basi
naamini huko anapokwenda kwenye maisha mapya, hawezi kukubali kufeli.
Watanzania tuendelee kumuombea
kijana wetu kwani kwa sasa ndiye anaipeperusha vema bendera ya Tanzania katika
soka la kimataifa.
Wapo wengi ambao wanakwenda kucheza
soka nje na kurudi Tanzania, lakini kwa Samatta, imekuwa tofauti.
Tangu mwaka 2011 alipoondoka
Tanzania na kwenda DR Congo kucheza soka pale TP Mazembe, basi kurudi kwake ni
kuja kuitumikia Taifa Stars au kipindi cha mapumziko tu.
Kila la heri Samatta katika maisha
yako mapya, mapambano lazima yaendelee.
0 COMMENTS:
Post a Comment