TAIFA STARS KAMILI GADO KUIVAA BURUNDI OKTOBA 11, HIMID KUWASILI LEO

OKTOBA 11, Uwanja wa Mkapa timu ya Taifa ya Tanzania, Taifa Stars itashuka kucheza na timu ya Taifa ya Burundi kwenye mchezo wa kirafiki wa kimataifa ulio kwenye kalenda ya Fifa.

Timu zote mbili tayari zimeshaweka kambi ambapo Stars wao waliweka kambi Oktoba 5 na kuanza kufanya mazoezi Oktoba 6, timu ya Taifa ya Burundi iliwasili Bongo Oktoba 6.

Seleman Matola Kocha Msaidizi wa Taifa Stars amesema:" Ni mchezo mgumu ukizingatia kwamba tupo nyumbani. Lakini kikosi kipo tayari kwa ajili ya kupata ushindi.

"Tutamkosa John Bocco ambaye alijiunga na kikosi akiwa na majeruhi ambayo aliyapata kutoka timu yake ya Simba na Himid Mau anatarajiwa kuwasili leo.

"Mashabiki wajitokeze kutupa sapoti hautakuwa mchezo rahisi kwa kuwa timu zote mbili zinajuana ndani ya uwanja.

Jimmy Ndayizeye, Kocha Mkuu wa Burundi amesema:" Tunawatambua Tanzania ni timu nzuri, tutafanya vizuri."