KATIKA HILI LA COSAFA TFF MNAHITAJI PONGEZI

 

TANZANIA ilisafiri na kombe kwenda nchini Afrika Kusini, hilo lilikuwa ni kombe la ubingwa wa Baraza la Mashirikisho ya Michezo Kusini mwa Afrika (Cosafa) kwa wachezaji chini ya miaka 20.

 

Safari hiyo ilikuwa ni kwenda nchini Afrika Kusini inapofanyika michuano ya Cosafa na Tanzania pekee wakiwa ni waalikwa kwa kuwa wako Ukanda wa Afrika Mashariki na wanapewa heshima hiyo zaidi ya mara mbili sasa kutokana na ubora ambao timu za Tanzania zimekuwa zikionyesha.

 

Wakati wa kurudi nyumbani, Tanzania imerudi na kombe la ubingwa wa wachezaji chini ya miaka 17. Hii maana yake, Tanzania walikwenda Afrika Kusini na kombe ambalo walitakiwa kulikabidhisha na wamerejea na kombe.

 

Kwa kuwa watu wengi hawafuatilii sana soka la wanawake, wanaweza wakawa wanapuuzia lakini uhalisia ni kwamba Tanzania kwa zaidi ya miaka minne sasa, imekuwa ikipata heshima kubwa kupitia dada na wadogo zetu.

 

Wamekuwa na juhudi kubwa na kuna mabadiliko makubwa katika mechi za wanawake kuanzia hapa nyumbani lakini pia katika michuano ya kimataifa.

 

Wanawake wamekuwa washindani wakubwa na sasa wametengeneza heshima kubwa kwenye nchi zote chini ya Ukanda wa Jangwa la Sahara na sasa kila anayeambiwa atakutana na Tanzania, anajiuliza mara mbili.

 

Mara kadhaa, tumeona hata timu za Afrika Kaskazini ambazo kwa soka la wanaume ndizo zinaongoza barani Afrika, zimekuwa na hofu na Tanzania katika michuano mbalimbali.

 

Tanzania sasa inapaswa kuanza kuchuana na timu Afrika Magharibi ili kutafuta ukubwa unaotambulika Afrika. Na nilifika Afrika Kusini na kushuhudia mechi zote za Tanzania za michuano ya Cosafa, hakika lilikuwa ni jambo la kujivunia na inaonyesha wazi kuwa Shirikisho la Soka Tanzania (TFF), limewekeza na limepania kupata mafanikio makubwa kwa upande wa wanawake.

 

TFF wameona namna ambavyo dada zetu wamekuwa wakijituma na kufanya vema. Wameona namna ambavyo wamekuwa wakijitoa na kupambana na wao tokea wamechukua kutoka kwa uongozi uliopita, wao wameongeza nguvu kubwa na matunzo ya juu ya timu za wanawake.

 

Katika michuano ya Cosafa, Tanzania ilienda na timu mbili katika michuano miwili tofauti. Ile ya wakubwa na ile ya chini ya miaka 17.

 

Timu ya wakubwa, Twiga Stars ilitolewa baada ya kushinda mechi moja dhidi ya Zambia, ikapoteza moja dhidi ya Botswana, zote matokeo yalikuwa bao 1-0. Lakini bado timu ilionyesha kiwango bora kabisa, hata kama umetolewa unaona ubora uliokuwepo ni ule wa kujivunia.

 

Kwa timu ya chini ya miaka 17, yenyewe ilicheza mechi tano na kushinda nne. Ilianza kwa kuichapa Comoro 4-1, ikakutana na Zambia na kupoteza kwa mabao 2-1. Mechi ya tatu, ikawatandika wenyeji Afrika Kusini 6-1 kabla ya kuwashindilia Zimbabwe kwa mabao 10-1.

 

Fainali na Zambia, ikawa 1-1 kwa dakika 90, mwisho kwa mikwaju ya penalti Tanzania ikashinda kwa 4-3. Ni jambo la kujivunia kutokana na ubora wa kiwango na matunzo sahihi wanayopewa wanapokuwa kambini.

 

Lazima tukubali kwamba hata kama ni jukumu lao lakini TFF wanaifanya kazi yao kwa weledi na wanatoa uangalizi na matunzo sahihi kwa wachezaji wa timu za taifa.

 

Mfano, zaidi ya madaktari watatu walisafiri na timu hizo mbili kuhakikisha kila kitu kinakwenda kwa usahihi kuhusiana na masuala ya afya za wachezaji lakini walipata kila kitu kwa weledi wa juu likiwemo suala la motisha.

 

Baada ya kuwa wamepoteza mechi dhidi ya Zambia, Katibu Mkuu wa TFF, Wilfred Kidao alitoa ahadi ya takribani Sh 500,000 kwa kila mchezaji ili warejee katika kiwango. Hakukuwa na kuwalaumu, badala yake walielezwa walichokosea, wakaaswa kurekebisha na kupewa motisha.

 

Kwa watu wanaolala vizuri, wanakula vizuri, wanasafiri vizuri, chini ya uangalizi wa mameneja wazuri na madaktari bingwa na maarufu. Lazima walete matokeo mazuri na hii ndio kazi kubwa wanayofanya TFF ambao tunapaswa kuwapongeza na kuwaunga mkono na hili lianzie kwa mashabiki wanaoipenda nchini yao ya Tanzania, wapenda mpira lakini hata kwa makampuni na Serikali ya Tanzania.Hongereni TFF kwa kazi nzuri.