SIMBA WATOTO WAFANYA MAUAJI KWAO MALKIA WA NYUKI

Kikosi cha Simba kinachoundwa na vijana wengi, leo kimefanya mauaji katika mechi ya kirafiki dhidi ya Singida United kwenye Uwanja wa Namfua mjini Singida kwa kuichapa kwa mabao 4-0.

Singida ndiyo mji anaotokea mlezi wa Simba, Rahma Al Kharusi maarufu kama Malkia wa Nyuki.

Simba ambayo iko njiani kwenda mjini Bukoba kuwavaa Kagera Sugar, Jumatano ijayo, ilionyesha soka safi na la kuvutia.

Kikosi hicho kiliundwa na vijana wengi zaidi, huku wakongwe kwa asilimia 98 wakiwa benchi na vijana wakaonyesha kuwa kazi wanaiweza.

Kikosi kilichopangwa na Patrick Liewig kutoka Ufaransa, kilikuwa kinasomeka hivi Abuu Hashim, Haruna Shamte, Waziri Omar, Hassan Hassan, Hassan Khatib, Jonas Mkude, William Lucian /Said Mangela, Mselem Salum, Christopher Edward, Ramadhani Singano ‘Messi’ na Marcel Kahezya ‘Rivaldo’ /Haroun Chanongo. 

wauaji wa mabao hayo manne walikuwa ni Rama Kipalamoto aliyefunga kiufundi kwa mguu wa kulia, Mselemu Salum, Omar Waziri na Singano ‘Messi’.

Simba iko katika kampeni kubwa ya kupambana na wachezaji wakongwe ambao wamekuwa wakionekana ni tatizo kubwa hasa katika nidhamu na kuamua kuwaamini vijana.

Ingawa mashabiki wamekuwa wana hofu kutokana na kukosekana kwa majina makubwa katika kikosi hicho, lakini vijana hao wamekuwa wakiendelea kufanya vizuri.

Mchezo dhidi ya Kagera Sugar unaonekana kuwa muhimu zaidi na mgumu kwa Simba kutokana na uimara wa timu hiyo inayonolewa na mshambuliaji wa zamani wa Simba, Abdallah ‘King Mputa’ Kibadeni.