FERDINAND AKUMBANA NA ADHABU YA TRAFIKI

Wiki moja tu baada ya kumaliza adhabu ya miezi sita ya kuzuiwa kuendesha gari, Rio Ferdinand amekutana na adhabu nyingine ya kulipa faini ya pauni 200 (zaidi ya Sh 520,000).

Beki huyo wa Man United ambaye amekulia katika kitongoji cha watukutu cha Peckham alikamatwa kwenye moja ya mitaa ya jijini la Manchester akiwa ‘kiatu’ kiana.

Rio hakuwa katika kasi kubwa akiwa na gari lake aina ya Jaguar XJ Supersport V8. Ilikuwa kama saa 2.41usiku wakati akiwa katika eneo linalotakiwa kutembea spidi 40 tu, yeye akazidisha hadi 48.

Baada ya kuonyeshwa spidi alizozidisha hakuwa na ujanja tena, pamoja na kuomba msamaha lakini ilishindikana na sheria ikachukua mkondo wake, akapigwa faini hiyo.

Beki huyo amekuwa akituhumiwa kutokana na mikasa isiyoisha ikiwemo ya uwanjani na nje, lakini mwenyewe amekuwa akisisitiza anataka kuishi maisha yake.