MTOTO AFA KATIKA UTAMBULISHO WA KOCHA MPYA MAZEMBE

Carteron akisaini mkataba wake na mmiliki wa Mazembe, Katumbi

Kocha mpya wa TP Mazembe, Patrice Carteron raia wa Ufaransa amesaini mkataba wa miaka miwili lakini utambulisho wake umezua balaa baada ya mtu mmoja kufariki dunia.

Kocha huyo wa zamani wa Mali, bado ataendelea kufanya kazi yake hiyo ya sasa kabla ya kurejea na kuanza kazi yake na TP Mazembe.

Baada ya kusaini mkataba na mmiliki wa Mazembe, Moise Katumbi alipelekwa kutambulishwa na watu walijitokeza kwa wingi sana uwanjani.

Hali iliyosababisha msongamano mkubwa hadi kufikia mtoto mmoja kukanyagwa hadi kupoteza maisha, kitu ambacho kimeelezwa ni pigo kwa mashabiki na jamii ya Lubumbashi.

Katumbi ambaye pia ni gavana wa jimbo hilo, tayari ametoa pole kwa familia ya mtoto huyo na Mazembe wameshiriki mwanzo hadi mwisho wa msiba huo.

Siku ya tukio hilo, kocha huyo mgeni aliishuhudia timu yake mpya ikiichapa Muungano kwa mabao 3-0 huku Mtanzania Thomas Ulimwengu akifunga bao moja.

Carteron amechukua kazi ya Lamine N'Diaye raia wa Senegal aliyeamua kujiuzulu baada ya timu yake kutolewa katika Ligi ya Mabingwa Afrika na Orlando Pirates ya Afrika Kusini.