YUSUF MANJI AWAPA MAJUKUMU MAZITO TEGETE, KAVUMBAGU

 

MWENYEKITI wa Yanga, Yusuf Manji, amebariki kutemwa kwa mshambuliaji mpya wa Yanga, 

Ogbu Brendan Chukwudi,raia wa Nigeria, lakini akawageukia nyota wanne katika kikosi hicho na 

kuwakabidhi jukumu moja kubwa.

Ogbu alitua nchini hivi karibuni kujaribiwa na Yanga, lakini nyota huyo alionyesha uwezo mdogo sambamba na kuwa majeruhi kila wakati, matatizo ambayo yaliilazimu klabu hiyo impe nauli ya kurudi kwao haraka.

Akizungumza na Championi Jumatano, Manji amesema kwa sasa hawatahangaika kumtafuta straika yeyote kutoka nje, badala yake washambuliaji waliopo sasa katika kikosi hicho wanatakiwa kuonyesha uwezo mkubwa kwa kufunga mabao msimu ujao wa Ligi Kuu Bara.

Kikosi hicho mpaka sasa kimesaliwa na washambuliaji wanne ambao ni Jerry Tegete, Said Bahanuzi, Didier Kavumbagu, Shaban Kondo na Hussein Javu, aliyesajiliwa hivi karibuni akitokea Mtibwa Sugar ya Morogoro.

Manji alisema endapo nyota hao wanahitaji kubaki katika kikosi hicho mzunguko wa pili wa ligi, wanatakiwa wafanye kazi yao ipasavyo ya ufungaji. Alisema endapo hilo litashindikana, Yanga itatumia kiasi chochote cha fedha kusajili nyota wapya katika dirisha dogo la usajili, Januari, mwakani.

“Tumewasajili ili waweze kuhakikisha Yanga inapata mabao mengi katika mechi zake, ndiyo maana tunawalipa fedha za kutosha, kwa sasa hatutasajili mshambuliaji yeyote, tunataka hawa tulionao sasa wafanye kazi yao ipasavyo, ndiyo maana tukamuongeza na Ngassa ili aongeze nguvu katika timu,” alisema Manji na kuongeza:

“Tunaamini bado wana uwezo mkubwa, ndiyo maana tumeamua kuwapa muda zaidi, wakishindwa kutupa kile tunachohitaji, tunaweza kuwaondoa na kutafuta wachezaji wengine katika dirisha la usajili lijalo.”