WAZEE WA YANGA WAMPINGA KATIBU MKUU MKENYA ALIYEAJIRIWA NA MANJI

 

MZEE AKILIMALI (KATIKATI)

Wazee wa Yanga wakiongozwa na Ibrahim Ally Akilimali wameingia katika mgogoro na uongozi wa Manji.

Wazee hao wamefunguka na kusema hawamtaki Katibu Mkuu mpya, Patrick Naggi ambaye anachukua nafasi ya Lawrence Mwalusako.

Wazee nao akina Akilimali, Hashim Muhika na Bilal Chakupewa wamesema wazi hawamtambui Mkenya huyo.

NAGGI

Katika Mkutano wao na Waandishi wa Habari leo makao makuu ya klabu, makutano ya mitaa ya Twiga na Jangwani, Dar es Salaam, Wazee hao wanapinga mambo mawili yaliyofanywa na uongozi wa Manji ambayo ni kuleta Mhasibu mwenye asili ya Kiasia na kuajiri Katibu mpya kutoka Kenya.

Naggi yupo tayari nchini kuanza kazi baada ya Mwalusako kuondolewa katika nafasi hiyo.

Akizungumza na Waandishi wa jhabari klabu leo, Mwenyekiti wa Wazee hao, Ibrahim Akilimali amesema kiongozi yeyote ambaye anapaswa kuiongoza Yanga, lazima awe mwanachama wa klabu hiyo, hivyo walivyofanya uongozi ni kinyume kabisa na Katiba inavyotaka.

“Mpaka sasa sisi hatumtambui, kwani hatuna vielelezo vyake vya kuwa mwanachama wa klabu hii, endapo atatuletea vielelezo hivyo sisi tutamtambua na kumpa ushirikiano.

“Kazi za Wanayanga zitafanywa na wanachama wetu pekee na si wa nje ya klabu yetu, hatutakubali hata chembe kuona katiba yetu ikikanyagwa na viongozi wetu, tutasimama kidete mpaka mwisho kuona jambo hili halifanikiwi,” alisema Akilimali.

Alisema wao wakiwa kama wanachama wa Yanga hawatambui ajira ya raia huyo wa Kenya na anatakiwa kuondoka ndani ya saa 24 klabuni hapo.

Akilimali alisema hawataki kumwona katika klabu hiyo, kwani Yanga ina wasomi wengi wenye uwezo wa kushika nafasi hiyo.

“Tunamuona Mkenya huyu kama ameingia kwa kupitia njia za Panya, kitu ambayo kamwe hatuwezi kukubaliana nacho,” alisema.

“Kawaida tumekuwa na kawaida ya kupata taarifa kutoka kwa Manji kama kunakuwa kuna kitu fulani. 

“Huyu mtu tunamwona ni ‘kanjanja’ aondoke haraka sana, sisi wana Yanga hatumuitaji kabisa,” alisema Akilimali.

Jana, Mkenya huyo alikuwa katika ofisi za makao makuu ya Yanga akiwa ameanza kazi na kufuatilia mambo kadhaa.

Hivi karibuni, mweka hazima wa Yanga naye aliachia kazi na imeelezwa nafasi yake kushikwa na mweka hazina huyo mwenye asili ya Kiasia.

Suala hilo limeelezwa kuigawanya Yanga kwa kiasi kikubwa na huenda likazua mgogoro mkubwa kama halitafanyiwa kazi haraka.