KADI NYEKUNDU YA BOBAN YAMPA MAJONZI MOROCCO

Kocha Mkuu wa Coastal Union, Hemed Morocco amesikitika kumkosa kiungo wake mshambuliaji Haruna Moshi ‘Boban’ katika  mechi zijazo baada ya kupata kadi nyekundu katika mchezo uliopita.

Kiungo huyo alipata kadi hiyo kwenye mechi ya Ligi Kuu Bara dhidi ya Mbeya City iliyochezwa kwenye Uwanja wa Sokoine mkoani Mbeya mchezo uliomalizika kwa sare ya 1-1.

Morroco amesema kuwa kukosekana kwa kiungo huyo ni pengo katika kikosi chake kutokana na umuhimu wake uwanjani.

Morocco alisema, licha ya kukosekana kiungo huyo wapo wachezaji wengine wanne wenye uwezo watakaoziba pengo lake na wawili kati ya hao ni Jerry Santo na Crispine Odula.

“Nasikitika kumkosa Boban katika mechi zitajazo za ligi kuu tutakazozicheza, hiyo ni kutokana na umuhimu na msaada wake kwenye timu akiwa uwanjani.

“Maandalizi yanakwenda vizuri wachezaji wote wako katika afya njema na kipa Shaaban Kado ameanza mazoezi leo (Alhamisi) afya yake imeimarika,” alisema Morocco.