KIBADENI AIZUNGUMZIA MECHI DHIDI YA RUVU SHOOTING TAIFA

KIBADENI (KUSHOTO) AKIWA NA MSAIDIZI WAKE, JAMHURI KIHWELO, MENEJA NICO NYANGAWA NA KOCHA WA MAKIPA, JAMES KISAKA.

Kocha Mkuu wa Simba, Abdallah Kibadeni amesema ubora wa kikosi cha Ruvu Shooting kinachonolewa na Boniface Mkwasa uko juu na wanalitambua hilo.

Simba na Ruvu Shooting zinakutaka keshokutwa katika mechi ya Ligi Kuu ya Bara kwenye Uwanja wa Taifa jijini Dar.

Kibadeni amesema wanalitambua hilo na wamekuwa wakifanya kazi kwa juhudi kubwa.

“Kawaida kila baada ya dakika tisini, unaanza maandalizi mapya. Tutacheza na Ruvu kama washindani wakubwa kwa kuwa tunajua wana kikosi bora.

“Hivyo tunajiandaa na tumepania kucheza mpira mzuri na kushinda, lakini tunatambua kuwa ni timu nzuri na wana kocha mwenye uzoefu,” alisema Kibadeni.

Simba imeweka kambi katika eneo la Bamba, Kigamboni, nje kidogo ya jijini la Dar es Salaam.

Simba inataka kuendeleza ushindi ili izidi kubaki kileleni.

Mechi yao ya mwisho, Ruvu Shooting walifungwa bao 1-0 dhidi ya mabingwa Yanga, tena kwa taabu kwa kuwa wanajeshi hao walionyesha kiwango cha juu na mchezo wa nguvu.

Kwa upande wa Simba, mechi yao ya mwisho ilikuwa dhidi ya JKT Ruvu na ilishinda kwa mabao 2-0.