YULE BEKI 'MKATILI' AANDALIWA KUMTULIZA TAMBWE KESHO

Beki mahiri wa Ruvu Shooting, George Michael amepewa jukumu la kuhakikisha mshambuliaji wa Simba, Amissi Tambwe hafurukuti katika mechi ya Ligi Kuu Bara dhidi ya timu hiyo kwenye Uwanja wa Taifa, Dar.

Ofisa Habari wa Ruvu Shooting, Masau Bwire amesema Michael alipewa jukumu hilo na kocha wake, Charles Mkwasa kuhakikisha Tambwe hapati nafasi kama alivyoweza kumdhibiti nyota wa kimataifa wa Yanga, Didier Kavumbagu na winga Simon Msuva katika dhidi ya Yanga, wiki iliyopita.

Licha ya kufungwa na Yanga bao 1-0, lakini beki huyo alikuwa gumzo kwa mashabiki kutokana na kiwango kizuri alichoonyesha.

 “Kwani Tambwe ndiyo nani? Kama Yanga walinyoosha mikono kwa nini asiwe yeye. Mpango wa kocha si kumtazama Tambwe tu, sema tumejiwekea utaratibu wachezaji wote kujua majukumu yao uwanjani.

“Tunajaribu kuwatengeneza kina Michael wengi kabla ya mchezo wa kesho. Siku zote Ruvu Shooting haigopi jina wala kiwango cha mtu na kila mchezaji ameishapewa jukumu lake kuelekea mchezo huo,” alitamba Bwire.

Tambwe ambaye ni raia wa Burundi pia mfungaji bora wa michuano ya Cecafa 2013, ndiye kinara wa mabao mpaka sasa  katika ligi kuu akiwa na mabao saba.