MASHABIKI WA NAPOLI WAWACHAPA WA ARSENAL, MMOJA AKIMBIZWA HOSPITALI

Mashabiki wa Napoli, wamewadunda wa Arsenal ikiwa ni sehemu ya kulipa kisasi baada ya timu yao kuchapwa mabao 2-0.

Katika vurugu hizo, shabiki mmoja wa Arsenal alijeruhiwa na kukimbizwa hospitali baada ya kuwa amechanika usoni.

Mara baada ya mechi hiyo ya Ligi ya Mabingwa Ulaya, mashabiki wa Napoli walitoka kweye Uwanja wa Emirates wakiwa na hasira na kuanza kuwashambulia wale wa Arsenall.

Walikwenda moja kwa moja katika eneo la Piebury Corner ambalo ni maarufu kwa mashabiki wa Arsenal kila kunapokuwa na mechi kwenye Uwanja wao wa nyumbani wa Emirates na kuanza kuwashambulia.

Walivunja vioo kwenye mgahawa huo huku wakitumia mawe na viti na baadhi walikuwa na mikanda waliyoitumia kuwachapa wengine.

Napoli ni kati ya mji unaoongoza kwa kuwa na vijana wababe nchini Italia, timu nyingi zimekuwa na hofu kubwa hasa mashabiki wao zinapokwenda kucheza kwenye mji huo.