EXCLUSIVE: MTOTO WA NIYONZIMA AANGUKA AKICHEZA NA WENZAKE NA KUFARIKI DUNIA

 

NIYONZIMA AKIWA MAZOEZINI YANGA, KULIA NI TWITE NA KUSHOTO CHUJI

Na Saleh Ally

Kiungo wa Yanga, Haruna Niyonzima amepata msiba mkubwa baada ya mwanaye kuanguka na kufariki dunia wakati akicheza na wenzake.

Mtoto huyo wa Niyonzima, Akbar aliyekuwa na umri wa miaka miwili na nusu, alianguka ghafla na kufariki dunia wakati akicheza na wenzake jijini Kampala, Uganda, mwanzoni mwa wiki hii.

“Mtoto wa Haruna ameanguka na kufariki dunia kule Uganda,” mtoa habari kutoka Kigali, Rwanda alilipasha Championi Ijumaa.

Blogu hii ilifuatilia ili kupata uhakika kuhusiana na tukio hilo na lilifika nyumbani kwake jijini Dar es Salaam na kumkuta mwanaye na mkewe.

Niyonzima raia wa Rwanda, alionekana kutopenda kulizungumzia kwa undani suala hilo.

“Ni kweli nimepata msiba wa mwanangu lakini nimekuwa na matatizo mengi yananiandama hadi nachanganyikiwa kwa kweli. Ningependa mniache kidogo,” alisema kiungo huyo kwa sauti ya taratibu.

Kweli Niyonzima, amendamwa na majanga kwa kuwa jana aliunguliwa na nyumba aliyokuwa akiishi katika eneo la Magomeni Makuti jijini Dar.

Hivyo, Blogu hii ikaendelea kufanya uchunguzi zaidi na kugundua mtoto huyo wa Niyonzima alikuwa akiishi na mama yake nchini Uganda.

“Tayari Haruna amempa nauli mdogo wake akashughulikie masuala ya msiba, yeye alikuwa na majukumu mengine lakini pia kama unavyoona, nyumba yake imeungua,” kilieleza chanzo kingine.

“Yule mtoto awali alikuwa Kigali lakini baadaye akahamia Kampala baada ya mama yake kupata kazi huko Uganda na walikuwa wakiishi huko.”

Niyonzima anaishi Magomeni Makuti jijini Dar pamoja mkewe na mwanaye Ramzey mwenye miaka takribani mitano.

Awali kulikuwa na taarifa za kuchanganya baada ya kusikika kuwa amepata msiba wa mwanaye, lakini ukweli si yule anayeishi naye nini Dar ambaye anajulikana kwa rafiki zake na mashabiki wengi wa soka nchini.

Stori ya ukurasa wa pili katika gazeti hili inaeleza vizuri zaidi kuhusiana na mkasa wa kuunguliwa nyumba yake. Isome.

Nadir Haroub ‘Cannavaro’ na Kelvin Yondani kwenye mechi za Ligi Kuu Tanzania Bara.

SOURCE: CHAMPIONI