TAMBWE ATAIJA SIKU ATAKAYOKUTANA NA YONDANI, CANNAVARO

 

TAMBWE AKIWA MAZOEZINI

Mshambuliaji wa Simba, Amissi Tambwe amesema kuwa hana mpango wa kuwaangalia na hawaogopi mabeki wa Yanga, Nadir Haroub ‘Cannavaro’ na Kelvin Yondani kwenye mechi za Ligi Kuu Tanzania Bara.

Mrundi huyo ambaye ameanza kwa kasi ya kufunga mabao saba kwenye mechi tano alizocheza, ameonekana tishio kwa timu shiriki za ligi hiyo.

Akizungumza na Championi Ijumaa, Tambwe alisema hana mpango wa kwenda uwanjani kwa ajili ya kuwaangalia Yondani na Cannavaro wakicheza mechi za ligi hiyo kabla ya kuvaana nao Oktoba 20, siku anayoamini lazima watakutana kwenye Uwanja wa Taifa jijini Dar es Salaam.

“Sina mpango wa kwenda uwanjani kabla kucheza nao kwa ajili ya kuangalia uwezo na aina ya uchezaji ya mabeki wa Yanga, nitaonana nao uwanjani siku ikifika.

“Nitaonana nao nikiwa uwanjani, wao wananizuia na mimi nikitaka kufunga, lakini licha ya hayo yote ninaheshimu uwezo wao, ninaamini ni wachezaji wazuri,” alisema Tambwe.

Huenda kukawa na ushindani mkali kati ya Yondani na Tambwe kwa kuwa wote wana kasi na wepesi katika kuiwahi mipira katika kuokoa au kufunga.