UJUMBE WA KUWASHUSHA TIMU B KIBADENI, JULIO WASAMBAZWA

KIBADENI, JULIO (KUSHOTO) WAKIWA NA NICO NYAGAWA NA JAMES KISAKA KATIKA BENCHI LA SIMBA

Katika hali isiyokuwa ya kawaida inaelezwa kuwa wachezaji wa Simba wamewatengenezea ujumbe mfupi wa maneno makocha wao, Abdallah Kibadeni na msaidizi wake, Jamhuri Kiwhelo ‘Julio’ wakiwataka na wao warudi kukinoa kikosi cha Simba B.

SALEHJEMBE ilifanikiwa kupata ujumbe huo uliotumwa na rafiki wa mmoja wa wachezaji waliosimamishwa wakitaka na wao washushwe hadi timu B kutokana na kuchapwa na Azam 2-1 hali iliyosababisha kushika nafasi ya nne kabla ya mechi ya jana dhidi ya Kagera Sugar.

Ujumbe huo unasomeka hivi: “Kibadeni na Julio wamerudishwa timu B, Matola (Selemani) kapanda maana makubaliano ni kuongoza ligi katika raundi hii ya kwanza sasa wanashika nafasi ya nne na bado mechi mbili tu.”

Baada ya muda wachezaji hao hutuma ujumbe mwingine ulioandikwa: “Hiyo ni chemsha bongo tu hawajashushwa ila nimeandika hivyo maana wao mchezaji akicheza vibaya siku moja wanampeleka timu B, wao timu ipo nafasi ya nne sasa, basi nao waende timu B ili wajue kuwa mpira ni mchezo wa makosa waache kutoa shutuma kwa wachezaji bhana.”

SOURCE: CHAMPIONI