MAKALA: WAANGALIE MBEYA CITY NA ZAMBARAU YAO

Na Saleh Ally

MARA kibao umesikia mashabiki wa Yanga na Simba wakichapana kwa madai kuwa mmoja wao amekiuka na kuvuka upande na kuingia upande wao akiwa na rangi ambazo si zao.

Yanga wanatumia kijani na njano, Simba ni nyekundu na nyeupe. Mashabiki na wanachama wa timu hizo wanazitumia kama msingi wa itikadi ya kila upande.

Inawezekana wako sawa au si sawa kwa kuwa rangi hizo si mali ya Yanga au Simba na zinatumika kwenye vitu vingi sana, kama bendera ya mataifa, makampuni na sehemu nyingine.

Ili kuthibitisha hii ni Yanga au Simba, kama hata ikiwa ni njano, kijani, nyekundu na nyeupe, bado suala la nembo au maneno ndiyo yanapaswa kuwa uthibitisho tu.

Azam FC imekuwa ikifanya vizuri kwa misimu mitatu sasa, inaonyesha ni moja ya timu bora na mwenendo wake kwenye Ligi Kuu Bara sasa unathibitisha hilo.

Lakini imekwama kwenye rangi, Azam FC bado haijajitambulisha kwa rangi rasmi, kwamba inatumia rangi fulani na ikionekana angalau bila nembo unaweza kusema hii ni timu fulani.

Mbeya City ambayo pamoja na kufanya vizuri kwenye Ligi Kuu Bara ukiwa ndiyo msimu wake wa Ligi Kuu Bara, imekuwa tofauti kwa kuwa imeweza mapema.

Mbeya City imeweza kujitambulisha katika msimu wa kwanza tu kupitia uwezo na sasa rangi ya jezi. Kama utavaa rangi ya zambarau na nyeupe, basi moja kwa moja unaonekana wewe ni mnazi wa Mbeya City.

Tayari wamefanikiwa kuichukua rangi hiyo ya zambarau katika msimu wa kwanza tu na ndiyo inayoshika nafasi ya tatu sasa kwa umaarufu baada ya njano na nyekundu ambazo zimekuwa zikichukuana tokea mwaka 1936 ilipozaliwa Simba.

Zambarau ilikuwepo, hakuna timu iliyotamani kuitumia na badala yake kijani na blue ndiyo zilikuwa zikigombewa na timu nyingine. Miaka minne iliyopita, African Lyon ikajitahidi na kuanza kutamba na rangi ya machungwa.

Pamoja na kuonyesha utofauti katika suala la rangi na muonekano mpya, lakini African Lyon ilishindwa kufanya vizuri na kupata umaarufu katika rangi za jezi zake kwa kuwa karibu misimu yote ilikuwa ikipambana isiteremke daraja.

Mambo yamekuwa tofauti kwa Mbeya City inayoongozwa na Juma Mwambusi. Hadi sasa ni kati ya timu zinazowania kutwaa ubingwa au kushika nafasi ya pili ambayo inatoa nafasi kwa timu kushiriki Kombe la Shirikisho.

Uimara wa Mbeya City bila ya kujali kuwa ni wageni wa Ligi Kuu Bara na wanashiriki kwa msimu wa kwanza umeifanya ijenge uimara wa soko lake.

Soko la jezi za Mbeya City ziko katika nafasi ya tatu kwa sasa. Ndizo jezi zinazouzika au kutazamwa sana baada ya zile za Yanga na Simba.

Tayari Mbeya City imeweza kuuza hadi jezi 10,000, kitu ambacho si kidogo. Ingawa wako wanaosema zimeuzwa zaidi, hata kama fedha bado haijaingia kwenye klabu. Bado inaonyesha klabu hiyo ya Mbeya imeishajenga msingi wa soko.

Tayari inaweza kufanya biashara, maana yake kama wataingia kwenye soko la vifaa, basi wana kila sababu ya kufanya vizuri hata kuliko Azam FC ambao wana uwezo kifedha na wamekuwa kitambo katika ligi kuu kuliko wao.

Nini nilichowafanya wafanikiwe? Jibu ni mambo mawili tu. Uwezo wa kazi yao waliouonyesha katika Ligi Kuu Bara na pili ni sapoti kutoka kwa mashabiki wao ambao wameonyesha wazi wanakubaliana na timu yao inachokifanya, wakawa wazalendo, wakajitolea katika michango na kujitokeza kwa wingi kuiunga mkono.

Mbeya City kwa sasa iko katika nafasi ya tatu kwenye msimamo wa Ligi Kuu Bara ikiwa imepiga mechi 21 na kati ya hizo imepoteza mbili tu.

Katika mechi hizo, Mbeya City imeonyesha ni kati ya vikosi bora kwa kuwa imefunga mabao 27 na kufungwa 17. Imefanikiwa kushinda mechi 10 na imepata sare 9.

Kama utafanya ubora wa viwango kutokana na kufunga, kufungwa, sare na mabao ya kufunga na kufungwa, Mbeya City iko katika tatu bora ya Ligi Kuu Bara.

Ndiyo inaonekana kuwa ‘tatizo’ kwa Simba kupanda katika nafasi hiyo, lakini hofu kwa Yanga na Azam FC kwamba inaweza kuwapokonya nafasi na kuvuruga hesabu zao.

Yanga na Azam FC wanachuana kileleni lakini macho ya wote wawili ni kwa Mbeya City kwa kuwa mwendo wao ni sawa na wale watu “wanaomfukuza mwizi kimyakimya.”