MSIZIBE MASIKIO KELELE ZA LOGA, PLUIJM KUHUSU VIWANGO VYA WACHEZAJI WETU

MAKOCHA wa Yanga na Simba, wamekuwa wakizungumza sana kuhusiana na kutoridhishwa na viwango vya wachezaji walio katika vikosi vya timu zao.

Si mara moja, Kocha wa Simba, Zdravko Logarusic alikuwa akizungumzia suala la kutofurahishwa na viwango vya wachezaji wake kuanzia mazoezini hadi kwenye mechi.

Awali kwa kuwa alizungumza kocha huyo raia wa Croatia na ana sifa ya ukorofi, wengi waliamini ni maneno ya kikorofi. Lakini Kocha wa Yanga, Hans van Der Pluijm naye alisema hilo kwamba kuna wachezaji ambao viwango vyao havimridhishi.

Kauli ya Pluijm ilikuwa ni kusisitiza kuhusiana na namna ambavyo wachezaji wake wanavyoweza kufanya anachotaka kifanyike. Hiyo ndiyo sifa ya uwezo wa mchezaji, kwamba anaweza kubeba alichopewa, halafu akiingia uwanjani anafanya kile pamoja na ziada.

Kiwango cha wachezaji ni kitu kinachobeba mambo mengi sana, si uwezo wa mchezaji kukimbia na kutoa pasi tu kwa mbwembwe anapokuwa uwanjani.

Kwa mashabiki wengi wa soka, wanavutiwa zaidi na wachezaji wenye kasi kwa kuwa watakimbia kwa kasi na ndiyo maana hushangilia kwa nguvu sana. Lakini kama hiyo haitoshi mashabiki huvutiwa na wachezaji wenye uwezo wa kupiga chenga za maudhi.

Sawa yote yanahitajika katika soka, lakini kadiri siku zinavyosonga mambo yanabadilika sana na wachezaji wanatakiwa kuwa na vitu vingi vya ziada ambavyo vitawasaidia kufanya mambo mengi wanayoagizwa na kocha.

Mfano, mchezaji anajua namna ya kumiliki mpira. Adui anapokuwa kulia yeye atauhifadhi kushoto. Wakati anakimbia na mpira afanye nini na sahihi mpira uwe umbali gani anapokuwa kwenye kasi.

Lakini pasi ipi ni bora kwa mwenzake katika kipindi gani. Lakini hiyo haitoshi, wakati wanashambuliwa kutokana na namba yake, akae wapi. Au kama ni beki anapokuwa amebaki pekee na mshambuliaji, ili kuwa na uhakika miguu yake inatakiwa kuwa vipi.

Kuna mbinu nyingi sana lakini si rahisi Logarusic au Pluijm kuzifundisha leo akiwa Simba au Yanga. Hawa wachezaji walitakiwa kufundishwa wakiwa katika shule za soka maarufu kama academy. Viwango vitakuwa bora pale tu wakiwa wamepata mafunzo hayo ya awali.

Kweli inawezekana tukakubali kuwa tumekosea na wachezaji wengi tulionao viwango vyao vinategemea zaidi vipaji binafsi na si mafunzo ya utotoni. Je, sasa tunafanya nini ili kubadilisha? Yanga, Simba na klabu nyingine zina shule bora kwa ajili ya vijana.

Hakuna ubishi Azam FC katika hili la kukuza vijana wanajitahidi, achana na Yanga na Simba ambao ‘wanaokoteza’ vijana au kuwakusanya kila wanapoona michuano fulani imekaribia na wengi wao wanalalamika hawana matunzo na hasa linapofikia suala la malipo.

Kuna namna ya kufanya, kama hadi sasa 2014 tumechelewa, kweli ni kosa. Lakini si sahihi kuendelea kukubali kufanya kosa zaidi kwa kuendelea kuchelewa. Maana yake huu ndiyo wakati mwafaka wa kubadili suala hilo.

Kulisahihisha au kulibadili, basi ni lazima tuwe na vijana wanaopata mafunzo bora, si bora mafunzo. Hao ndiyo watakaokuja kuwa tegemeo la klabu na Tanzania kwa jumla na inawezekana pia makocha watakaokuja baadaye, kamwe hawatalalamika.

Leo Pluijm na Loga kwa kuwa ni Wazungu angalau wameweza kufungua midomo yao na kusema ukweli. Msiotaka kuambiwa ukweli mtawachukia, lakini jiulizeni kwa nini makocha hao ingawa kila mmoja kwa wakati wake lakini wamelalamika kuhusiana na kitu kinachofanana.

Kusikiliza na kukubali au kukataa ni hatua moja, lakini hatua muhimu zaidi ni kufanyika kwa utafakari. Soka sasa linaendana na mafunzo kuanzia utotoni na si kuamini vipaji kama nilivyoeleza hivi karibuni. Msizibe masikio, zitumieni kauli za Pluijm na Loga kama kinga ya kuepusha kuwa na wachezaji wasio na mafunzo hapo baadaye, inawezekana.