MBEYA CUTY TAYARI KUANZA UJENZI WA UWANJA WAKE

Huku klabu kongwe za Simba na Yanga zikiendelea kushangaa-shangaa, Mbeya City yenyewe inatarajia kuanza ujenzi wa uwanja wake eneo la Iwambi Julai, mwaka huu.

Timu hiyo mpya kabisa inayomilikiwa na Manispaa ya Jiji la Mbeya, inaonekana kuwa na mikakati kabambe baada ya kuushangaza umma kwa kumaliza katika nafasi ya tatu katika msimu wake wa kwanza kwenye Ligi Kuu Bara.

Katibu wa timu hiyo, Emmanuel Kimbe, alisema huenda ujenzi huo ukaanza katika mwaka mpya wa fedha wa Julai.

Alisema wanafanya hivyo ili kuweza kuwa na uwanja wa mazoezi kwa sababu uwanja huo utajengwa katika awamu tatu kama walivyokuwa wameainisha awali.

“Ujenzi wa uwanja wetu mpya utaanza katika mwaka mpya wa fedha ujao. Matarajio yetu yetu ni kwamba, kuanzia Julai, mwaka huu ndiyo tutaanza kazi hiyo ya ujenzi.

“Na uwanja utajengwa katika awamu tatu kama tulivyokuwa tumepanga mwanzo, mafanikio yatakayojitokeza mwanzo ndiyo yatatufanya tusonge mbele zaidi,” alisema Kimbe.