MICHO ASEMA BAO LA KIIZA LIMEWAWEKA KWENYE MATUMAINI YA KUING'OA MADAGASCAR

Kocha Mkuu wa Uganda ‘The Cranes’, Sredojevic Milutin ‘Micho’ amesema bao pekee la Hamisi Kiiza ndiyo limewaweka kwenye matumaini ya kuwang’oa Madagascar.

The Cranes walipoteza kwa mabao 2-1 dhidi ya wenyeji wao Madagascar katika mechi ya kuwania kucheza hatua ya makundi ya Kombe la Mataifa Afrika.

Kiiza ndiye alifunga bao pekee la Uganda katika hatua za mwisho wakati Uganda ikiwa nyuma kwa mabao 2-0.

Ushindi wa bao 1-0 tu mjini Kampala utawapa nafasi Uganda ingawa Micho ambaye ni kocha wa zamani wa Yanga, amesema wanataka kushinda kwa mabao mengi.

“Hata ikiwa tatu au nne, itakuwa ni jambo la msingi lakini tayari ni mechi ngumu.

“Bao moja la Kiiza linatuvuta kwenye njia nzuri ya mapambano kwa kuwa tunataka kuvuka,” alisema micho raia wa Serbia.