MWOMBEKI ASISITIZA BADO ANATAMANI KUBAKI SIMBA

Mshambuliaji wa Simba, Betram Mwombeki, amesema anaamini ataendelea kubaki kwenye timu hiyo licha kutocheza mechi nyingi msimu ulioisha mwezi uliopita.

Mwombeki hakuwa na nafasi kwenye kikosi cha kwanza katika nusu msimu kutokana na kutokuwa na maelewano mazuri na kocha wake Mcrotia, Zdravko Logarusic, lakini kabla ya hapo alikuwa akipewa nafasi chini ya kocha Abdallah Kibadeni na akafanikiwa kufunga mabao manne.

Mwombeki amesema anachokifanya katika kipindi hiki ni kuangalia mpangilio wa timu jinsi utakavyokuwa kutokana na kuwa bado ana mkataba wa kuitumikia timu hiyo.

“Nitaangalia mpangilio wa timu kama nikiridhika nao basi nitaendelea kuwepo kwa sababu hata mzunguko wa pili sikufanya vizuri kutokana na kuumwa lakini bado nina mkataba nao wa mwaka mmoja.

“Hata kama Loga akirudi kwenye timu, kwa upande wangu nitakuwa tayari kuendelea kufanya naye kazi na kujituma mazoezini na baadaye aweze kuniamini,” alisema Mwombeki ambaye kuna wakati ilibidi afarijiwe na wachezaji wenzake baada ya Loga kumuingiza uwanjani kisha kumtoa baada ya dakika tano tu.