STEVE YANGA AANGUA KILIO KISA DOMAYO

 

STEVE (ANAYEZOMEA) AKIFURAHIA KUWASILI KWA EMMANUEL OKWI, SAFARI HII ALIANGUSHA CHOZI SABABU YA DOMAYO.

Muda mfupi baada ya Yanga kupoteza wachezaji wawili, kiungo Frank Domayo na mshambuliaji, Didier Kavumbagu ambao wote wameenda Azam FC, shabiki maarufu wa Yanga, Steven Samwel ‘Steve Yanga’ au Steve Machozi’, amemwaga machozi na kufikiria kuihama timu yake hiyo.

Steve ambaye alipata umaarufu kwa kulia baada ya timu yake kufungwa 5-0 na Simba mwaka 2012, amesema amesikitishwa sana na Yanga kumwachia Domayo kwenda Azam wakati anaamini ni mchezaji mzuri.

“Kiukweli nimeumia sana baada ya Kavumbagu na Domayo kwenda Azam, niliamini kuwa ni miongoni mwa wachezaji watakaoendelea kuitumikia timu yetu kwa msimu ujao.

“Sijui cha kufanya kwa sasa, natamani hata nihame Yanga niende Azam kwa sababu Domayo na Kavumbagu ni wachezaji wanaoweza kuleta furaha muda wowote pindi timu inapohitaji ushindi,” alisema Steve huku akimwaga machozi kama ilivyo kawaida yake.