VAN GAAL KUIKABA HISPANIA NA MABEKI WATANO

Msema kweli, kipenzi cha Mwenyezi Mungu, Kocha Luis van Gaal wa Uholanzi amefunguka na kusema atachezesha walinzi watano siku watakapokutana na Hispania ambao ni mabingwa wa Kombe la Dunia.

Kombe la Dunia litachezwa nchini Brazil kuanzia wiki ijayo.

Van Gaal ambaye ndiye kocha mpya wa Manchester United, amesema atawapanga Daryl Janmaat, Stefan de Vrij, Ron Vlaar, Bruno Martins Indi na Daley Blind kuhakikisha wanawazuia Hispania katika Kombe la Dunia.

Mechi hiyo ya kwanza kwa kila timu katika hatua ya makundi imekuwa gumzo zaidi kwa kuwa ndiyo ilikuwa ya mwisho Kombe la Dunia 2010.

Mwaka 2010, Hispania iliilaza Uholanzi kwa bao 1-0 lililofungwa na Andres Iniesta na kubeba kombe hilo.

Lakini safari hii, wakali hao wanakutana katika hatua ya makundi na mechi yao ni kati ya zitakazotazamwa na watu wengi zaidi hatua za makundi.