MAKALA: AVEVA NA ZAWADI YA MBUZI KWENYE GUNIA KUTOKA KWA ANKO RAGE

KAMA kawaida, mheshimiwa Ismail Aden Rage alianza uongozi wa Simba na ujanja mwingi, amemaliza hivyohivyo, ujanjaujanja tu.

Mambo yanaweza kuwa mengi, lakini mawili tu yanaweza kutosha kudhibitisha namna ambavyo mambo mengi hayakuwa sawasawa ndani ya Simba, nitayataja.

Haya yametokea wakati wa uongozi uliopita wa Klabu ya Simba chini ya Rage, ulipokuwa ukikabidhi ofisi kwa ule mpya chini ya Rais Evans Elieza Aveva ambaye sasa ana jukumu la miaka minne kuiongoza Simba na kuirudishia heshima yake.

Kazi ya Aveva haitakuwa rahisi na lazima Wanasimba kama kweli wanaipenda klabu yao, wakubali kumsaidia, naye awe tayari kupokea misaada hata kama itakuwa ya ushauri. Kipindi cha Rage, Simba imevurugwa sana.

Tukirudi kwenye suala la makabidhiano, Rage alikabidhi vitu wazi huku akivitaja, lakini ajabu suala la kwanza alipoanza kuonyesha kuna walakini ni aliposhindwa kutaja Simba imebaki na kiasi gani cha fedha benki!

Rage hakusema, aliwaeleza waandishi wa habari kwamba ilikuwa ni siri kubwa kwa kuwa hata pale alipokuwa anazungumza nao wengine ni Yanga. Hivyo ni silaha ya klabu hiyo kuficha walichokuwa nacho.

Maneno hayo yanaonyesha kupitwa na wakati, wale ambao mnakumbuka wakati wa uchaguzi uliomuingiza Rage madarakani, nilijitokeza mapema na kueleza msimchague Rage kwa kuwa ataifanya Simba kwenda mwendo wa kizamani, uliojaa migogoro kama ule wa wakati wa Chama cha Soka Tanzania (Fat) kilichokuwa kinaongoza kwa migogoro kuliko kingine chochote.

Huenda mliamini mimi ni mbaya, nina nia mbaya, najua mkanivika ubaya, sasa ni wakati wa kupima ukweli. Mara zote ninahoji, wako wapi waliokuwa wapambe wa Rage waliopinga kila nilichosema?

Kuficha kiasi cha fedha walichonacho Simba ni kubabaisha mambo kwa kuwa wanachama wanatakiwa kujua klabu yao ina kiasi gani na hilo litawekwa wazi tu wakati mahesabu yatakapotakiwa kukabidhiwa kwa wanachama.

Wanachama wa Simba hawawezi kufanya mkutano wa siri, maana yake taarifa hizo zitamfikia kila mtu. Kuficha una kiasi gani ndiyo silaha kwa adui? Kichekesho.

Aveva kakubali kupokea zawadi ya mbuzi aliye kwenye gunia, lazima yeye atakuwa anajua kiasi gani kilichopo kwenye akaunti za Simba. Vizuri akaweka wazi kwa kuwa taasisi zinazohusu wanachama, kwa kawaida ni vizuri kuweka hadharani mahesabu yao kila baada ya miezi mitatu. Hii itasaidia wanachama hao kujua mwenendo wa klabu.

Kuficha maana yake kuna tatizo, Simba ikiwa na fedha nyingi hakiwezi kuwa chanzo cha kuangushwa na kama ingekuwa na fedha nyingi, vipi Rage aliondoka bila ya kuwalipa wachezaji lukuki mishahara yao hadi uongozi wa Aveva ulipofanya hivyo wiki iliyopita? Siri maana yake ni kuficha madudu!

Mimi siamini kama wanachama hawawezi kujifunza katika mambo kama haya ambayo hawahitaji nguvu hata kidogo kutafakari na kung’amua kuwa Rage alitumia nguvu nyingi kuficha suala la mahesabu kwenye mikutano ya wanachama na sasa amekataa kutaja, maana yake kuna tatizo kubwa.

Mwisho nauliza na ninasisitiza kama ambavyo nimekuwa nikihoji awali, ziko wapi fedha dola 300,000 (Sh milioni 480) za mauzo ya Mganda, Emmanuel Okwi kwenda Etoile du Sahel ya Tunisia?

Wale waliosema zitalipwa, wengine wakashiriki kumuandikia Rage makala dhidi yangu iliyojaa blah-blah kibao, kwamba nilikuwa ninahisi kitu ambacho si sahihi, lazima zitalipwa kwa wakati, ziko wapi hizo fedha sasa? Mwisho Simba imeambulia karatasi, barua eti Fifa inatambua kesi. Upuuzi mtupu!

Aveva amekabidhiwa deni, tena kwa mara nyingine Rage akizua jambo jipya ambalo halina hoja hata chembe, eti Okwi alikuwa mchezaji huru, Simba ikawahi kumuongezea mkataba, ndiyo maana nimekuwa nikisisitiza Mganda huyo aliuzwa bure. Hoja ya msingi hapa, fedha ziko wapi?

Simba ilimuongezea mkataba, ikatoa dola 40,000 (Sh milioni 64), halafu ikaenda kumgawa bure, yenyewe ikaambulia ‘ziro’ na aliyesababisha yote hayo ni Rage kwa kuwa alikuwa ana haraka na kulazimisha uhamisho hata kabla Waarabu hao hawajatoa fedha.

Wajumbe wa kamati ya utendaji wakati huo walieleza wazi kuwa Rage alifanya maamuzi kivyake.

Sasa Simba imepoteza fedha ilizompa Okwi, imepoteza nauli na matumizi ya watu waliosafiri kwenda Tunisia kushughulikia suala hilo, fedha kwa ajili ya kesi ya Okwi Fifa na kuna dalili zote mzigo aliopewa Aveva kwa kuwa kakabidhiwa deni utakuwa mkubwa kwake na kupoteza muda tu.

Nilimsikia Rage akisema eti Etoile du Sahel wameshindwa kulipa fedha hizo kwa kuwa kuna matatizo katika Serikali ya Tunisia katika suala la uhamishaji fedha. Jiulize Etoile hawafanyi biashara kwa sasa, mbona tunasikia wanasajili wachezaji kutoka Afrika Magharibi?

Wakati Rage akiwa Fat alikuwa akisema anavyojisikia, anaeleza maneno yasiyo sahihi akitumia vipengele vya katiba ya Fifa na watu wakaamini.

Sasa mambo yamebadilika, watu wanajisomea mambo, wanaelewa na hakuna tena nafasi ya kudanganya! Ndiyo maana unaona ni rahisi kujua uozo na blah-blah kwa urahisi.

Rage hakupaswa kumkabidhi Aveva deni lililotokana na uzembe wake, ilitakiwa fedha. Aliahidi fedha hizo angezipata kabla ya kuondoka, nikasema haitawezekana, leo amekabidhi maneno matupu na amethibitisha nilichokieleza, nasisitiza Simba haikustahili kumuuza Okwi bure halafu ikaendelea kupoteza fedha eti inashughulikia.

Kama Rage angekuwa makini mwanzoni, basi haya yasingetokea. Kulazimisha kwake mambo, sijui kwa nini ndiyo kumekuwa chanzo cha haya! Aveva ajifunze, ikiwezekana na Rage awaombe radhi Wanasimba kwamba hakuwa sahihi na ameharibu mambo.

Nina hoja za msingi kumhoji Rage bila kujali ninaowaudhi kwa kuwa ni rafiki au wapambe, ukweli ndiyo huo Simba ili ibadilike lazima isiende mwendo wa aliokuwa nao Rage, la sivyo kufeli kutakuwa ndiyo njia.