MBRAZIL JAJA WA YANGA KUANZA KUJIFUNZA KISWAHILI KABLA YA KINGEREZA

Mshambuliaji mpya wa Yanga, Geilson Santana maarufu kama Jaja atalazimika kuanza kujifunza Kiswahili kwanza badala ya Kingereza.

Jaja raia wa Brazil anazungumza lugha moja tu, Kireno na maneno machache ya kubahatisha ya Kingereza.

Kutokana na kuzungukwa na wachezaji au Watanzania wengi wanaozungumza lugha ya Kiswahili, mshambuliaji huyo atalazimika kujifunza maneno ya Kiswahili.

Kikazi amekuwa hana shida kwa kuwa Kocha Mkuu, Marcio Maximo na msaidizi wake, Leonaldo Leiva wanazungumza Kireno kama yeye.

Lakini maneno muhimu kama “nimepita”, “napita”, “nipitishie”, “piga huku”, “achia mojamoja” ni lazima ajifunze haraka ili kuwasiliana vizuri na wenzake.

Wakati akiifundisha Taifa Stars, kati ya maneno ya mwanza ambayo alijifunza Maximo yalikuwa ni “kidogokidogo” na “harakaraka”.