MTOTO WA KIGOGO SIMBA APATA ULAJI REAL MADRID

SALEH AL RAWAH AKIPAMBANA UWANJANI KATIKA SHULE YA MAFUNZO CHINI YA REAL MADRID.

Yule kinda mtoto wa kigogo wa Simba aliyewahi kuandikwa na gazeti hili wakati akikipiga Arsenal tawi la Oman, sasa ametua Real Madrid.

Saleh Musley ,10, mtoto wa Musley Al Rawah ambaye ni mjumbe wa kamati ya usajili ya Simba, amewavutia Real Madrid ambao wametoa ofa ya kumpeleka Hispania.

SALEH AL RAWAH AKIFAYA VITU MBELE YA WENZAKE

Saleh amekuwa kivutio kutokana na uwezo wake mkubwa licha ya umbo lake kuonekana ni dogo ukilinganisha na wenzake.

MUSLEY

Wakati akicheza kwenye shule ya watoto ya Arsenal jijini Muscat, Saleh alilazimika kurushwa na kucheza na wale wanaomzidi umri zaidi ya miaka mitano.

Baba yake amethibitisha taarifa hizo zilizowekwa kwenye mtandao wa Shirikisho la Soka Oman (Ofa) kuwa amekuwa kivutio kwa timu kubwa.

“Ni kweli Saleh amepata nafasi hiyo ya Real Madrid, lakini ni suala la familia sasa na tunapaswa kulijadili.

Naomba niachie kwanza nilifanyie kazi nitakupa taarifa baada ya kufika Oman,” alisema Al Rawah.

 Kinda huyo amekuwa akifananishwa na Lionel Messi kutokana na kasi yake uwanjani lakini uwezo mkubwa wa kuwapiga chenga wakiwemo wale wanaomzidi umri.

Kawaida klabu kubwa kama Arsenal, Real Madrid na nyinginezo zimekuwa na shule maalum za watoto katika nchi mbalimbali barani Asia ikiwemo Oman.