BAADA YA KUICHAPA MGAMBO, STAND WAITUMIA SALAMU SIMBA

Baada ya ushindi wa bao 1-0 dhidi ya Mgambo FC ikiwa ugenini, Stand United imetamba kuwa inataka kuendelea kubeba pointi za ugenini.

Baada ya kuichapa Mgambo leo kwenye Uwanja wa Mkwakwani mjini Tanga, mechi inayofuata, Stand itakutana na Simba kwenye Uwanja wa Taifa jijini Dar.

Athumani Bilal maarufu kama Bilo ambaye ni kocha msaidizi wa Stand United amesema wanataka kuendelea kushinda ugenini bila ya kujali mechi inayofuata wanakutana na nani.

“Hatuwezi kusema tunaidharau Simba, tunachotaka ni ushindi katika mechi zote za ugenini.

“Tulianza kwa kupoteza nyumbani, tumeshinda ugenini na tunataka kushinda tena ili tukirudi nyumbani tuwe na pointi.

“Tunajua mechi ya Simba itakuwa ngumu sana, lakini mechi zote pia ni ngumu,” alisema Bilo.

Stand ilianza kwa kuchapwa mabao 4-1 dhidi ya Ndanda FC ya Mtwara.