HIVI KWELI HUU NDIYO MWISHO WA TAIFA STARS YETU!

Na Saleh Ally

TUMSUBIRI nani ambaye atakuja kutuokoa na kuitoa timu yetu ya taifa hapa ilipo ili iweze kusonga mbele hatimaye kupata nafasi ya kucheza michuano hii miwili mikubwa duniani ambayo sasa karibu kila mmoja amecheza, sisi bado kwa zaidi ya miaka 30!

Nazungumzia Kombe la Mataifa Afrika, ambalo mara ya kwanza na mwisho ilikuwa ni 1980 nchini Nigeria na Kombe la Dunia ambalo Taifa Stars, haijawahi hata kuonyesha angalau inakaribia kuvuka na kuingia huko.

Wakati Taifa Stars inashiriki michuano hiyo kwa mara ya kwanza na mwisho, nilikuwa nina umri wa mwaka mmoja na ushee. Sijui hata ilivyokuwa zaidi ya hadithi ninazopewa, dalili zinaonyesha hata nikijaaliwa kufikisha miaka 50 au 60 au zaidi, bado itaendelea kuwa hadithi.

Ninaamini itakuwa hivyo kwa kuwa mfumo wa mwendo wetu umekuwa ni ule wa kupanda na kushuka au nafuu inatangulia halafu mbaya zaidi inafuatia, hii ni hatari.

Siamini kama Watanzania wote wana uchungu na Taifa Stars, kuonekana haina lolote, timu nyanya inayoweza kufungwa na timu yoyote inayokutana nayo, iwe ni Msumbiji na hata Burundi ambao wakikutana na sisi, sasa ndiyo wanyonge wao!

Angalau wakati wa uongozi wa TFF, chini ta Leodegar Tenga kulikuwa na mabadiliko na mwamko katika kikosi cha Taifa Stars, ambayo aliikomboa kutoka huko nyuma kutoka Fat iliyokuwa chini ya akina Muhidin Ndolanga, Ismail Aden Rage na Michael Wambura.

Sasa tuko palepale, tumerudi kulekule kwa kuwa Taifa Stars yetu sasa ni zaidi ya kichwa cha mwendawazimu na kila mmoja anaona anaweza kuwa kiongozi TFF na vibaya zaidi, wengi hawapendi kuambiwa.

TFF imejaza watu wengi ambao si sahihi, watu ambao wana sauti kubwa ndani ya shirikisho hilo na wanaamini wanachofanya ni sawasawa.

Wachezaji walio Stars pia naweza kusema hawajitumi, hawana moyo wa kizalendo na hakuna anayeweza kuweka mezani sababu za msingi vipi timu yetu iwe inafungwa karibu na kila timu.

Malawi wanatupa shida, Msumbiji hatuwawezi, Burundi wanatuonea, nani sisi tunamuweza? Vipi Tanzania ambayo kikosi chake sasa kina udhamini mkubwa na wachezaji wanapata kila kitu wakilala kwenye hoteli nzuri lakini hawafanyi lolote.

Rais wa TFF, Jamal Malinzi amekuta mambo mengi yamenyooka, kwa kuwa karibu wadhamini wote waliingia wakati wa kipindi cha Tenga, yeye amefanya nini. Ndoto na ahadi zake wakati anaingia madarakani vipi? Mbona sasa watu wanakuwa wakali hawataki kuhojiwa.

Mnataka tukae kimya, mfano mimi ambaye katika uhai wangu, nimeona Taifa Stars ikifungwa mechi nyingi zaidi kuliko ilizoshinda! Natakiwa kuendelea kuvumilia au natakiwa kuhoji?

Malinzi ambaye alikuwa tumaini la wengi wakati alipozuiwa kugombewa na wengi wakamlilia, nahoji vipi naye anaonekana hana tofauti kwa kuwa kila anachofanya amefeli?

Wapambe wengi ambao wanalazimika kila anachofanya kionekane ni kizuri kwa ajili ya kumlipa fadhila kutokana na ushikaji wake kwao, ‘kawabeba’ wako kwenye nafasi zisizostahili, hawataki wahojiwe.

Washauri, wasiojua lolote, ambao hawakuwahi kuucheza mpira, kufundisha au kusomea uongozi wa soka, ndiyo wanaoipeleka TFF huku inapokwenda. Lakini bado wanaona kuhoji tunapokwenda ni jambo baya au kumuonea Malinzi! Sasa tunyamaze?

Nchi ya namna gani hii ambayo ina watu wasiokereka na kufeli, wanaoona poa tu kwamba kufeli ni mazoea yao na wako tayari kuendelea kufeli. Utaona sasa Taifa Stars haina uhakika wa kucheza Kombe la Mataifa linalofuatia wala Kombe la Dunia mwaka 2018.

Maana yake Kocha wa Taifa Stars, Mart Nooij, sasa atakuwa anaendelea kupokea mshahara huku akila 'bata' tu, anakwenda na kurudi kwao kwa kuwa Tanzania ni wajinga waliwao.

Kuna timu nchi ambazo hakuna aliyezitarajia kucheza Kombe la Mataifa Afrika. Angalia Guine, Botswana na hata Cape Verde ambayo haifikishi hata watu milioni moja. Nao wamecheza, sisi tuko hapahapa na huenda njia rahisi ni kuomba kuandaa.

Mimi ninaumia kwa kuwa ni mshindani, ninaona timu za wenzetu zinaendelea kufanya vizuri, waliokuwa wakifanya vibaya wanabadilika na kufanya vyema, ambao hawakuwahi kufuzu sasa wanafuzu, sasa ni wakati wa sisi pia kubadilika.

Malinzi afanye kitu, ikiwezekana awatupe washauri wake ambao sasa wanauza maneno lakini ukweli wamefeli kwa kumshauri madudu kibao yakiwemo ya Taifa Stars maboresho ambayo tayari imepotea.

Halafu aanze mchakato wa uchunguzi kuzaa jibu la  nini hasa cha kufanya ili kubadilika kutoka katika kichwa cha mwendawazimu sugu kupita kiasi hadi watu wanaoweza kubadilika.

Inawezekana, lakini haiwezi kuwa kirahisi hivyo kama wanavyofikiria na hasa hiyo timu ya washikaji ambayo inazidi kuvurunda. Mimi nachangia kidogo tu, kwamba nguvu kubwa lazima iwe kwa vijana.

Angalau wakati wa Tenga, vijana walipewa nguvu na ndiyo hao kina Thomas Ulimwengu na wenzake ambao sasa ni tegemo. Lakini wakati wake Malinzi, hakuna la maana, hakuna vijana na soka la wanawake kwishney. Maana yake, tutaendelea kusubiri milele na miaka ndiyo inazidi kwenda, nimechoka, tumechoka!