SUMU YA KUIMALIZA YANGA, IKO KWENYE MIOYO YA WANAYANGA WENYEWE

YANGA ni klabu kongwe zaidi ya soka hapa nchini na ndiyo inaaminika kuwa yenye wapenzi wengi zaidi kuliko nyingine zote hapa nchini.

Mpinzani mkubwa wa Yanga ni Simba, kwa kuwa ndiyo klabu kongwe zaidi kuliko nyingine zote nchini zinazokubalika zaidi.

Kukubalika kwa Yanga na Simba ni suala la historia na rekodi, kwa kifupi ni klabu za wananchi ndiyo maana unaona zinachipuka klabu zenye fedha na zinazojitahidi kwa mengi kama Azam FC, lakini bado hazifikii ukubwa hata robo ya Yanga na Simba.

Wapo ambao wamekuwa wakikasirika kuona Yanga na Simba zinakuwa kubwa na huenda wanataka kuupokonya ufalme huo kwa siku moja au mbili, ni kujidanganya badala yake wanatakiwa kufanya kazi ya ziada.

Maana hata wale wanaopambana na ukubwa wa Yanga na Simba kwa kuwa wako Azam FC, Mtibwa Sugar au kwingine, hakika walianzia kupenda mpira kupitia klabu hizo mbili, kwingine wamehamia kwa ajili ya ajira au kuhamisha tu mapenzi.

Huo ni mfano tu, ninacholenga ni kutaka kukumbusha ukubwa wa klabu kama Yanga, kwamba haikuanza hivihivi kirahisi tu. Kuna watu wameumia hadi kufikia ilipo sasa.

Maisha ya Yanga yamekuwa ni kama wale wanariadha wanaopokezana vijiti, kwamba baada ya fulani atapewa huyu, baada ya muda tena anachukua yule.

Hii ni kawaida na mafanikio ya klabu yanaendana na wale waliopo baada ya kupita waliotoka. Sasa tunazungumzia waliopo ndani ya klabu na hasa wanachama.

Wao ndiyo wenye deni kubwa la kuiendeleza Yanga kwa kuwa wanatakiwa kuwa na mawazo endelevu au chanya na si yale yasiyozaa lolote au hasi.

Kuna watu wengi ndani ya Yanga wamekuwa wakijisifia kuhusiana na mapenzi yao kwa klabu, lakini ukweli wanajali maslahi yao na wanaangalia wanaweza kupata zaidi nini si Yanga itapata nini kusonga mbele, hawa ni sumu.

Wako ambao wanafanya kila kitu kuona Yanga inaendelea na hii ni kutokana na mapenzi yao ya dhati kwa klabu ambayo wanaamini ni furaha ya mioyo yao, ndiyo maana wako tayari kujitolea.

Wamepita watu wengi walioichangia Yanga, ndiyo maana waliopo sasa wameikuta vile. Bado wako wenye mioyo ya kutaka kuiona inaendelea na wanataka kujitolea, basi waungwe mkono.

Wote wanaoigeuza Yanga mtaji, nawaita sumu kwa kuwa kuiua ni kuchangia kuporomoka kwa mpira nchini kwa kuwa wengi watakatishwa tamaa.

Kujitolea kwa ajili ya maendeleo ya kitu hasa kinachohusisha utaifa ni jambo jema, hivyo wale wanaojali matumbo yao kwa kisingizio kuwa wanaipenda Yanga au wametoka nayo mbali, ni simu ya maendeleo ya klabu hiyo na wamekuwa wakitumia muda wao mwingi kutengeneza wimbo wa majungu kwa kila viongozi wanaotaka kujitolea.

Kuipenda Yanga bila ya kuichangia lolote ni kuidanganya nafsi, kuiunga mkono bila ya kusaidia lolote pia ni unafiki. Lakini kuwakubali viongozi au watu ambao wanaimaliza Yanga kwa kuwa utafaidika, wewe ni sumu, jitambue.

Mafanikio ya Yanga lazima yatapatikana kupitia Wana Yanga wenyewe na si vinginevyo. Hivyo kila anayeamini kweli anataka maendeleo ya Yanga, basi ajipigie hesabu na kuangalia kwamba kipi amewahi kukifanya kwa ajili ya kuisaidia klabu yake.

Ilipofikia Yanga sasa, ni robo ya inachostahili kwa kuwa ndani ya Wanayanga, wako ambao ni sumu na wanatafuta maendeleo yao na si ya klabu. Basi vizuri watafutiwe maziwa ili kuinusuru iweze kwenda na kasi sahihi ya maendeleo, wanaoonekana wanataka kusaidia maendeleo, waungwe mkono kwa kuwa hapa ilipo kwa hesabu tokea mwaka 1935, inaonekana imechelewa.