TFF VERY BUSY KUKOMOANA, KUWAZIBA WATU MIDOMO, WENZETU WANAPAMBA KOMBE LA MATAIFA AFRIKA

UGANDA wamepoteza nyumbani katika mechi yao ya makundi kuwania kucheza Kombe la Mataifa Afrika (Can) kwa kufungwa na Togo kwa bao 1-0.

Kwa rekodi zao inaonyesha kwenye mashindano makubwa walipoteza nyumbani mara ya mwisho mwaka 2004, miaka kumi iliyopita. Maana yake sasa wanajipanga kurekebisha mambo watimize ndoto ya kucheza Kombe la Mataifa Afrika.

DR Congo wamefungwa na Sudan wameitwanga Nigeria bao 1-0, DR Congo pia wamepoteza kwa bao 1-0 wakiwa nyumbani dhidi ya Ivory Coast kama ilivyo kwa Malawi ambao wamefunga 2-0 na Algeria pia wakiwa kwao.

Waliopoteza wote watakuwa wanajipanga, walioshinda pia watajiandaa zaidi ila usisahau jambo kwamba nchi zote nilizozitaja ni jirani zetu au kutoka kwenye uanda wetu, viko busy kuwania kucheza Kombe la Mataifa Afrika.

Wakati nchi hizo zinapambana kupata mafanikio sahihi katika mchezo wa soka, Shirikisho la Tanzania (TFF), liko busy kupambana kuwaziba mdomo wote wale ambao wanaonekana kipingamizi kulizuia kwenda kwenye njia ambayo si sahihi.

TFF kupitia sekretarieti yake ambayo imechukua majukumu ya kamati ya utendaji sasa inafanya kila linalowezekana kufungia wadau wote wenye uwezo wa kupambana na kupinga mapungufu yao pia kuwaogopesha wengine waliotaka kuwaunga mkono.

TFF sasa iko kwenye mikakati ya kubadili kanuni ili iweze kuibana bodi ya ligi isiwe na meno, iwe ni ile ambayo itaendesha mambo yake kwa uoga.

Inawezekana kabisa kuvibana hata vyombo vya habari ambavyo vinaonekana kushangazwa au kushitushwa na uongozi huo ambao ndiyo mpya lakini umefeli, umeonyesha hauwezi na sasa unapambana nje ya njia sahihi ya kuleta maendeleo.

Kikubwa ni kwamba TFF inaendesha mpira wa Watanzania na hata ifanye lipi haiwezi kukwepa kukosolewa kwa kuwa hakuna anayeimiliki TFF ambayo ni taasisi ya umma.

Kulazimisha mambo sasa ni kujidanganya tu kwa kuwa ukweli wa kila kitu uko wazi lakini nina ushauri na sitachoka kushauri hata kama kutakuwa na juhudi za kujaribu kunizima, nitasema tu, hata kama nimelala.

Kwamba TFF, lazima ianze kutafakari kwamba Watanzania wamechoka kufeli, Watanzania wamechoka kuumia na kuona nchi za jirani hata zile ambazo hazikuwa na uwezo kama wan chi yetu zikifanya vizuri.

Nchi za jirani ziko kwenye mipango ya kucheza Kombe la Mataifa Afrika, sasa ndiyo TFF ingekuwa inajiandaa na kuachana na tabia ya kuamini mechi za kirafiki ndiyo saizi ya Watanzania na kwa kuwa mechi hizo zitaingiza fedha kwa shirikisho hilo.

Kama inataka fedha zaidi iwe na mikakati sasa ili kuandaa timu itakayocheza vema kwenye michuano ya awali ya Kombe la Dunia na lile la Mataifa Afrika hapo baadaye.

Kwa sasa sisi ni Watanzania watazamaji, TFF inahusika, iache kutuzuga au kupoteza muda eti kuna watu walihujumu timu, badala yake ianze kupanga mikakati sasa.

Ingalie timu za taifa za vijana na si kwa kulazimisha kuchukua fedha za wadhamini wa klabu. Iwe na ubunifu angalau kidogo kama ile TFF ya Leodeger Tenga iliyopata udhamini kwenye timu kubwa ya taifa na leo TFF ya Malinzi inautumia.

Isilale, isiwe laini, isiwe ngumu kufikiri, nyepesi kulaumu. TFF ya Malinzi kwa kuwa ina kitengo cha masoko, basi isilipe mishahara bure, watu wake wafanye kazi na kusaidia kupatikana kwa wadhamini.

Kupora fedha za wadhamini wa klabu, kuzitumia eti kuendeleza timu za taifa ni mipango iliyopitwa na wakati kwa kuwa utaua mizizi kwa madai unataka kumwagilizia mashinda. Kwani kuna wachezaji wa timu ya taifa? Hao wanaokwenda timu ya taifa kwani wanatokea wapi, si kwenye klabu, sasa kipi ambacho hamuelewi?