IBRAHIM SHIKANDA ACHUKUA NAFASI YA KALI ONGALA

KALI (KULIA) AIKUMBATIANA NA KOCHA MKUU WA YANGA, MARCIO MAXIMO.

Kocha Msaidizi wa Azam FC, Kali Ongala, amebwaga manyanga kuifundisha timu hiyo ambayo ni bingwa mtetezi wa Ligi Kuu Bara.

Kali, ambaye alijiunga na Azam kama mchezaji na baadaye kupandishwa na kuwa kocha msaidizi, juzi Jumatatu alitangaza kuachana na timu hiyo akisema kuwa anataka kwenda kuongeza elimu yake ya ukocha nchini Uingereza.

Msimu uliopita, Kali aliponea tundu la sindano kutimuliwa klabuni hapo, baada ya aliyekuwa kocha mkuu wa timu hiyo, Muingereza Stewart Hall, kufungashiwa virago vyake kutokana na uongozi kutoridhishwa na utendaji wake ambapo nafasi yake ilichukuliwa na Mcameroon, Joseph Omog.

Kali amesema kuwa ameamua kuachana na Azam kwa sababu anataka kwenda kuongeza elimu ya ukocha nchini Uingereza na atachukua muda mrefu.

“Sijaondoka kwa sababu timu imefungwa mechi mbili ila nimefikia hatua hiyo kwa sababu nataka kwenda kuongeza elimu ya soka nchini Uingereza ambako nitatumia muda mrefu,” alisema Kali.

Naye Katibu Mkuu wa Azam FC, Idrissa Nassoro, aliliambia gazeti hii kuwa, tayari wameshapata mrithi wa nafasi hiyo iliyoachwa na Kali.

“Kuanzia sasa Ibrahim Shikanda ndiye atakayekuwa kocha wetu msaidizi mpaka hapo Kali atakapomaliza masomo yake japokuwa hatujui atamaliza lini,” alisema Nassor.

Shikanda ambaye ni raia wa Kenya, aliwahi kuitumikia klabu hiyo akiwa kama mchezaji na nahodha.