TEGETE AWEKA HADHARANI HISIA ZAKE ZA KUGOMBEA UBUNGE JIMBO LA ILEMELA

TEGETE (KULIA) AKIPAMBANA NA JUMA NYOSSO.

Mshambuliaji wa Yanga, Jerry Tegete, amesema anatarajia kugombea ubunge kwa tiketi ya Chama cha Mapinduzi (CCM) katika Jimbo la Ilemela mkoani Mwanza mara baada ya kustaafu soka.

Jimbo hilo kwa sasa linashikiliwa na Highness Kiwia kupitia Chama cha Demokrasia na Maendeleo (Chadema).

Tegete alijiunga na Yanga msimu wa 2008/9 akitokea Shule ya Sekondari Makongo ambako alikuwa anasoma.

Tegete aliweka ujumbe kwenye ukurasa wake wa tandao wa Kijamii wa Instagram akisema anatarjia kugombea ubunge.

 “Ninachukua uzoefu kutoka kwa Mwigulu Nchemba, ‘soon’ nitagombea ubunge kupitia chama changu cha Mapinduzi.” Na baada ya hapo mashabiki kibao walionekana kumuunga mkono.

Alipotafutwa ili afafanue kuhusiana na hilo, mshambuliaji huyo wa Yanga 'raia' wa Songea aliyekulia jijini Mwanza, alisema:

“Ni kweli nitagombea lakini ni mapema sana kulizungumzia suala hilo, likishakuwa tayari nitakueleza na wewe utakuwa mtu wa kwanza kujua.”

Tegete ni kati ya washambuliaji wanaoaminika wana uwezo mkubwa wa kufunga mabao hapa nchini.