KISA MBEYA CITY, COASTAL, YANGA YAPANGA KUBAKI BAGAMOYO

MBEYA CITY

Yanga itabaki mjini Bagamoyo kuendelea na kambi hata baada ya mechi dhidi ya Azam FC kesho.

Yanga ikimalizana na Azam, itaelekea Mbeya kuumana na Mbeya City kwenye Uwanja wa Sokoine kisha kuivaa Coastal Union kwenye Uwanja wa Mkwakani, Tanga.

Jerry Muro ambaye ni mkurugenzi wa habari wa Yanga alisema kuwa wameamua kubaki Bagamoyo kulingana na uzito wa mechi zilizo mbele yao, hivyo baada ya mechi hizo tatu benchi la ufundi litalazimika kutoa tathmini yake kulingana na kambi hiyo kisha watatoa mapendekezo yao mengine kulingana na mechi nyingine zinazofuata.

“Yaani kwa sasa programu ndiyo ipo hivyo, timu ikimaliza mechi na Azam itarejea Bagamoyo na itadumu huko mpaka imalize mechi zake za Mbeya na Coastal, tumeamua kubaki huko kutokana na ugumu wa mechi zenyewe.

“Lakini baada ya mechi hizo tutalisikiliza benchi la ufundi linasemaje na lina tathmini ipi kuhusiana na kambi wanayoitaka kutokana na mechi zitakazokuwa mbele yao kwa wakati huo,” alisema Muro.