MWADUI FC YAWATEMA WABEKI WAKONGWE COSTA, SALUM SUED KUSI

Wakati saa chache zimebaki kufungwa kwa dirisha la usajili, Mwadui FC inayoshiriki Ligi Daraja la Kwanza, imewatema wachezaji wawili wakongwe Salum Sued Kusi na Victor Costa.

SALUM SUED (KUSHOTO) WAKATI AKIITUMIKIA MTIBWA SUGAR.

Kusi aliwahi kung'ara na Yanga pamoja na Mtibwa Sugar kama ilivyo kwa Costa aliyewahi kufanya vizuri na Mtibwa kabla ya kung'ara zaidi na Simba.

Kocha Mkuu wa Mwadui FC, Jamhuri Kihwelo 'Julio' amesema ameamua kuwatema kutokana na mambo mawili.

"Salum Sued aliumia katika mechi dhidi ya Real Madrid wale Maveterani. Nikaona hawezi kuwa fiti haraka, hivyo nimemwachia.

NYUMBA YA COSTA ILIYOTEKETEA KWA MOTO.

"Costa alipata matatizo, kama ulisikia nyumba yake iliungua yote. Hawezi kuwa vizuri, lakini tukipanda, bado ni kati ya wachezaji ninaowahitaji," alisema.

Nyumba ya Costa iliyo eneo la Tegete iliteketea vibaya kwa moto na ilielezwa chanzo kilikuwa ni hitilafu ya umeme.