KIPA IVO ATANGAZA MAPEMA, BEKI AKIZINGUA ANAKULA NGUMI

Kipa namba moja wa Simba, Ivo Mapunda, amewapa onyo la mwisho mabeki wake na kuwaambia kuwa wawe makini kwa dakika zote 90.

Kipa huyo mzoefu amesema mabeki hao wanatakiwa kuacha kufanya makosa ya kizembe, la sivyo ataenda mbali zaidi kwa kuwaonya kwa kuwapiga ngumi.

Katika mechi dhidi ya Stand, kipa huyo alitaka kuwapiga mabeki wake baada ya kufanya makosa mara kadhaa.

Ivo alisema kuwa katika mechi nyingi, amekuwa akiwaona mabeki wake wakijisahau katika ukabaji na kufanya makosa mengi ya kizembe, kitu ambacho kinaweza kuigharimu timu na kuiweka kwenye nafasi mbaya.

 “Inafikia kipindi namuonya beki aliyefanya makosa kwa kumsukuma ila naona makosa bado yanafanyika, kama wakiendelea hivi hata ngumi nitakuwa nawapiga, makosa wanayoyafanya ni ya hatari, kama wakiyafanya kwenye mechi dhidi ya timu inayojua kuyatumia vyema, basi tunaweza kufungwa kirahisi,” alisema Mapunda.