MASHABIKI FC PLATINUM WATAMBA YANGA ITAKIONA LEO TAIFA

Mashabiki wa FC Platinum ya Zimbabwe wametamba hakuna wa kuizuia timu yao katika ukanda wa Afrika Mashariki.

Mashabiki hao wametamba katika mitandao mbalimbali kuwa FC Platinum itaiadhibu Yanga kama ilivyofanya kwa Sofapaka ya Kenya.

Baadhi ya mashabiki tayari wako jijini Dar es Salaam na wametamba katika mitandao ya kijamii hasa Twitter na Facebook kwamba wataondoka na ushindi.

Platinums iko jijini Dar es Salaam, tayari kuivaa Yanga katika mechi ya kwanza ya Kombe la Shirikisho.

Kabla ya kukutana na Yanga, FC Platinum iliing’oa Sofapaka ya Kenya kwa kuishinda nyumbani na ugenini.

Mashabiki hao wanaamini, ndicho kitakachowakuta Yanga waliong’oa BDF XI ya Botswana.

Hata hivyo, Yanga ambayo mechi yake ya mwisho ililala kwa bao 1-0 dhidi ya Simba, imesisitiza itafanya vema katika mechi ya leo.