SOMA HII MAKALA UONE STEVEN GERRARD ANAVYOWEZA KUWA SOMO KWA SOKA LA BONGO

Na Saleh Ally

MIAKA 26 ya uhai wake, Steven George Gerrard ameimalizia akiwa katika klabu moja tu ya Liverpool, hiki si kitu kidogo.

Gerrard alijiunga na Liverpool akiwa na umri wa miaka minane tu, baada ya mkuza vipaji mmoja kumuona. Ameichezea timu kubwa ya Liverpool kwa miaka 17, tena kwa mafanikio makubwa ambayo hayana mfano.

Leo Gerrard anaondoka Liverpool kwenda kujiunga na LA Galaxy ya Marekani kwa mkataba wa dola milioni 9 (Sh Bilioni 18), fedha ambazo soka ya Tanzania ambayo inakua kwa mwendo wa kinyonga haijawahi kupata mchezaji aliyeuzwa hata robo ya fedha hizo.

Gerrard anaondoka Liverpool akiwa na miaka 34. Anauzwa kwa thamani ambayo hazina Yanga wala Simba. Hakuna mchezaji kijana au mzee wa Tanzania mwenye robo ya thamani hiyo.

Kujituma kwa aina gani? Nidhamu ya juu kwa kiasi kikubwa ambayo nani anaweza kuwa nayo? Gerrard anamshangaza kila mmoja, lakini nani angeweza kufanya kama yeye?

Liverpool ndiyo klabu ya kwanza ya England kuwa na mashabiki wengi nchini humo. Gerrard ndiye mchezaji aliyezungumzwa zaidi kwa kipindi kirefu kuliko wengine wote hapa Tanzania.

Ameshinda makombe muhimu 10 akiwa na Liverpool kama utazungumzia Kombe la FA, lile la Ligi, Ligi ya Mabingwa Ulaya na mengineyo.

Akiwa nahodha wa Liverpool ameshinda zaidi ya zawadi binafsi 20. Ubora wa Gerrard unawezekana kwa hapa nyumbani Tanzania?

Wangapi wamedumu kwa muda mrefu katika klabu zetu? Wangapi wamekuwa tayari kujitolea kwa dhati hadi kufikia mafanikio makubwa kwa siku nyingi!

Unaweza kusema Gerrard alikuwa katika mazingira mazuri na Liverpool, ndiyo maana amedumu sana. Lakini utakuwa hujawahi kusikia matatizo makubwa yaliyomkuta akiwa na klabu hiyo, lakini akabaki hadi kufikisha miaka 17 akiwa na timu kubwa.

Unakumbuka mashabiki walivyomshambulia mama yake mzazi kwa maneno makali ya kumdhalilisha? Wakati fulani, mashabiki walichoma moto jezi yake akishuhudia kwenye runinga! Bado Liverpool ilimzungusha kumsajili kwa kiasi kikubwa siku chache baada ya kuipa ubingwa wa Ulaya kule Istambul, Uturuki.

Wakati huo Chelsea chini ya Jose Mourinho ilikuwa tayari kumchukua kwa kitita kikubwa. Lakini akavumilia hadi mwisho na kuchukua kiasi cha kawaida na kubaki tena Liverpool?

Si lazima mchezaji Mtanzania aone haiwezekani lakini si vizuri kumuacha Gerrard aondoke bila yeyote kujifunza kuhusiana naye. Mtu aliyepitia mengi ya kukatisha tamaa, lakini akayashinda na juzi ameagwa kama shujaa.

Mabao 503 katika mechi 119 kwa kiungo si kitu kidogo. Huyu anaonyesha hakuwa mtu mzembe, hakuwa mtu wa kulaumu tu, mtu wa kulia anaonewa huku akiwa hajitumi kufanya lolote.

Rekodi za Gerrard zilijengwa na hali ya kutaka kushinda. Hali ya kupambana bila kuchoka na nia ya kushinda kila wakati bila ya woga.

Ambacho amekikosa katika maisha yake ya soka ni Kombe la Ligi Kuu England. Lakini kila mmoja ataona alivyokuwa akipambana hadi siku ya mwisho, katika maisha bahati mbaya ipo.

Tafuta mchezaji sasa anayeweza kufanana hata kidogo na Gerrard. Lakini vipi mchezaji fulani anataka kujifananisha naye ndotoni bila ya kuiga aliyokuwa akiyafanya.

Nahodha anayeaminika hata wakiteuliwa manahodha wengine 11 kuunda kikosi maarufu duniani, basi yeye atakuwa nahodha wao anakwenda ‘kupumzika’ Marekani na kumalizia soka lake.

Gerrard ni ubao wa darasani ambao tayari una maandishi maalum ambayo unaweza kuwafunza wachezaji wengi wa Tanzania kwamba kuna mengi aliyoyafanya yeye yanawezekana.

Mazingira ni jambo moja, si rahisi mchezaji wa Tanzania akataka kufanikiwa kwa mazingira ya England. Lakini anaweza kumtumia Gerrard kama mfano na vizuri kuangalia maisha ya ndani na nje ya uwanja pia.

Akiwa kinda, kweli amewahi kuingia katika misukosuko kadhaa, ikiwa ni pamoja na kufikishwa mahakamani. Lakini alipofunga ndoa na Alex Curran, baadaye wakafanikiwa kupata mabinti watatu, Lilly-Ella, Lexie na Lourdes alionyesha tofauti kubwa na alisifia namna mkewe alivyokuwa akimuunga mkono.

Familia ikishirikishwa, inaweza kuwa msaada. Huenda familia za Kitanzania au Kiafrika zinaweza kujifunza kwamba kama zitamuunga mkono mhusika wao, anaweza kufanikiwa.

Gerrard ni kamanda. Kweli anakwenda lakini lazima tukubali kwamba si sahihi kumuacha akaenda bila kumtumia kama funzo kubwa angalau kwa machache tu.

Mvuto wa ushabiki, sawa. Lakini mvuto wa mafunzo kupitia yeye ni mkubwa zaidi na anaweza kusaidia.

MAKOMBE:

KOMBE LA FA

 2001, 2006

KOMBE LA LIGI

2001,2003, 2012

NGAO YA JAMII:

2006

LIGI YA MABINGWA

2005

KOMBE LA UEFA

2001

UEFA Super Cup

2001, 2005